Hadien 11 snem ba la sdang ia kane ka lympung Indian Super League (ISL) ha India, mynta ka kynti ki nongpyniaid jong ka ISL ryngkat ka jingmynjur jong ka klob North East United Football Club (NEUFC) kaba dei ruh ka klob kaba mih khmat ia 8 tylli ki jylla kiba don ha ka thaiñ Shatei Lammihngi (North East) bad ka All India Football Federation (AIFF) ki la rai ban pynlong ia 3 tylli ki jingialehkai ha madan Jawaharlal Nehru Stadium, Polo Shillong.
Kane ka khubor ka la pynsmiej shuh shuh ia ki paid ieit phutbol ka jylla namar kane ka lympung ISL kadei kaba heh tam ha ka ri India baroh kawei bad ban ioh pdiang (host) ia kane ka lympung ka long ka jingkyrkhu bad ka jingurlong ia ka jingangnud jong kiba bun.
Kane ka khubor ka wan ruh hadien ba seisoh ka jingpynlong ia ka Durand Cup ha ka nongbah mynta u snem. Ha kine ki khyndiat snem ka nongbah Guwahati ka la ioh ban pdiang bad pynlong ia ki jingïalehkai ha la ïing (home game) na ka bynta ka klob North East hynrei ban kyntiew shuh shuh ia kane ka jingialehkai bad khamtam ka jingiohi ki nongpyniaid ka NEUFC ia ka jingieit phutbol ka jylla Meghalaya, la rai ban rah ha Shillong na ka bynta 3 tylli ki jingïalehkai, kata ha ka 7 bad 14 Rymphang 2025, 21 Lber 2025.