Ka klob Shillong Lajong FC ka la ioh ban khur ia ka jingjop don burom ha ka jingiakhun ba nyngkong jong ki ia ka lympung Shillong Premier League (SPL) mynta u snem pyrshah ia ka Langsning FC ha kaba ki la thep haduh 4 kol la 0.
Ha kane ka jingialehkai ba la pynlong da ka Shillong Sports Association (SSA) ka Lajong ka khlem sei madan ia ki snar ialehkai kiba tbit, kata kiba la ialehkai ha ka lympung Durand Cup namar ban tyngkai bad pynkhreh na ka bynta ka lympung I-League ka ban sa sdang noh shen.
Haba sdang ka jingialehkai, ka Lajong ka la ioh ban pynkhih jar nyngkong lyngba u Kynsaibor Lhuid ha ka minit ba 21, katba ia ki 3 kol la ioh ban thep da u Deibormame Tongper ha ka minit ba 34, 39 bad 72. Ka Langsning kaba dei kawei na ki klob ba la paw ha ka jylla bad kaba dei ruh ka lahduh (Champion) ha u snem 2017 bad 2018 ka la iakhun tyngeh ha kane ka sngi hynrei haduh ban da kut ka minit ialehkai ki khlem ioh ban thep kol.
Haba phai sha kawei pat ka jingialehkai, ka Ryntih Sports Club ka la ioh ia ka jingjop da 3-0 kol pyrshah ia ka Nongthymmai Sports Club. Ia kitei ki 3 kol la ioh ban thep da u Yami Longvah ha ka minit ba 62, Dameki Khongsti ha ka minit ba 76 bad u Wanshanlang Dkhar ha ka minit ba 86.
Lashai ka sngi ka 18 tarik Risaw, ka jingiakhun kan long hapdeng ka Mawlai SC pyrshah ia ka Rangdajied United ha ka por 11:50 ha madan SSA Polo, Shillong.