Ka Jaintia National Council (JNC) Khliehriat Circle mynta ka sngi ka 17/10/2024 hapoh ka jingialam u General Secretary bah Symboh Sumer, ka la leit ban buh da ka jingthoh sha ka office u DC ka East Jaiñtia hills District Khliehriat, u S. Awasthi ban kyntu iaka tnat treikam ha kaba iadei bad ka surok NH-6 khamtam ha Khliehriat kaba lah dap mynta sa da ki pum pum ba mih na une u surok khamtam ha ka por leit skul wan skul ki khynnah, khnang ban pynduna ia ka jingmih ki pum pum la dei ban maramot noh ia utei u surok.
Namar ba lyngba une u pum pum ba mih na une u surok ka lah ban ktah lut ia baroh ki ïng ki sem, ki dukan, khamtam ki khynnah skul bad ia baroh hi ki briew kiba iaid lyngba une u surok NH-6. Ha Ka jingthoh ka seng kala pynbor ruh ia ka NHAI ban maramot kloi ia une u surok namar ba nangne shakhmat ka mariang ruh ka lah i biang ban shna noh ia u surok kumba ka NHAI ka lah kular ban leh khnang ba kan long hi ka jingmyntoi ia u paidbah ba iaid lyngba une u surok.
Kum ban shu pynkynmaw ba hakine ki snem bala dep (2023) ka seng kalah ujor shaduh sha ka tnat Ministry jong ka Road transport and Highway badei ban maramot noh ia u surok NH-6 bad naka liang ka NHAI kalah ai jubab da kaba ong ba lah dep ban phah iaki ar tylli ki contractor kata ka SL infra Ltd bad ka MR Ltd ban maramot noh ia u surok NH6 naduh Jowai shaduh Ratacherra.
Halor katei ka phang haba iakren bad u DC u lah kular hakhmat ka seng ban leh ia kaba donkam eh bad un sa shimkhia ia kane ka jingdawa jong ka seng bad u la Ong ruh ba kane ka long kaba biang eh namar ka pum pum kalah ban ktah iaki nongiaid lynti khamtam ki khynnah skul bad u la bynrap ruh ba un phah iakiba dei hok ban peit iakane ka kam bad ba kin sa leh iakaba donkam eh.
Naka liang jong ka seng ka pynpaw iaka jingsngew nguh ia u DC ba u la kloi ban shim khia halor kane ka kam kaba donkam eh naka bynta ka bha ka miat jong ki paidbah.