Ki dkhot ka Jaiñtia Women Council (JWC) hapoh ka jingïalam ka kong Evansara Lamare kila shah khang lynti mynta ka sngi ha ka por ba thmu leit ïashim bynta ha ka Public Hearing ne ka jingpynsngew paidbah jong ka M/S Meghatop Cement Private Limited halor ka projek ban seng ïa ka kharkhana Dewbilat ba thymmai ka “Integrated Cement Plant of Capacity 3.3 MTPA Clinker 2.8 MTPA Cement & 16 KW Waste Heat Recovery System’ kaba don ha shnong Wahiajer Narpuh, East Jaiñtia Hills District.
Ïa kane ka jingpynsngew paidbah la pynlong mynta ka sngi 18 tarik u Risaw, 2024 naduh ka por 11 baje mynstep, hynrei kiba bun na ki nongpyrshah kynthup ïa ki sengbhalang kiba thmu ban leit sha kane ka jingpynsngew paidbah kim shem la ïoh lad satia ban leit rung sha ka jaka ba pynlong Public Hearing, namar ha ka Gate ba nyngkong la ap pahara da ki nongshnong (Volunteer) kiba la bat lang bad ki dieng ki siej, nangta sa ha ka Gate kaba ar la ap pahara pynrkhing bha da ki Pulit, ki Magistrate bad ki nongshong shnong (Volunteer) kynthup ïa ki kynthei bad shynrang.
Ka President jong ka seng ki longkmie ka Jaiñtia Women Council (JWC) ka kong Evansara Lamare kala pynrem jur ïa kane ka jingshah khang lynti jong ki, da kaba ong ka myntoi aiu ban khot pynlong ïa kane ka jingpynsngew paidbah khlem da ïoh lad ban pynsngew ïala ka jong ka nongrim ha rynsan ban pyrshah ïa katei ka jingthmu.
Kum ka seng hashwa ban leit sha katei ka jingïalang Public Hearing kila dep ban pan jingbit shwa na u Deputy Commissioner ka EJHD ban ïashim bynta khlem da wanrah kino kino ki jingpynklumar da kaba ïaid ha ka lynti kaba jaijai. Kala ong kane ka jingleh jong kitei ki nongshong shnong bad ki bor sorkar kala long kumba kila dep “shah thied ha katei ka Company kaba thmu ban seng karkhana”.
Shuh shuh kila kynthoh ïa kane ka jingpynlong ‘Public Hearing’ kaba la shah tang ïa kiba kyrshan, katba ïa kiba pyrshah ki khang lad ban leit ïashim bynta bad kane kala long kum ba pynkheiñ ïa hok ban kren. Kila kynthoh jur ïa ki pulit kiba la pynsahkut khnang ïa ki kali ha shi lynter ka surok (NH-6) naduh ka por mynstep haduh ba kut ka Public Hearing.
Kila kren shai kum ka seng ki longkmie wat lada kim ïoh lad ban leit ïashim bynta mynta ka sngi ha kane ka Public Hearing, hynrei kin ïeng beit ha ka nongrim khlem kynran dien ban pyrshah ïa kane ka jingthmu seng Karkhana ha kine ki sngi ban wan.
