Ka Mawlai SC kaba dei ruh ka lahduh jong ka lympung Shillong Premier League (SPL) 2023 ka la mad ia ka jingjop ha ka jingsdang jong ki ia ka jingiakhun na ka bynta kane ka lympung pyrshah ia ka Rangdajied SC kaba dei kawei na ki klob ba kiew sted bha ha kine ki khyndiat snem ka kingdom jong u Eugeneson Lyngdoh.
Kane ka jingiakhun jong 2 tylli kine ki kynhun ha kane ka sngi, kadei kawei na ki jingïalehkai ba itynnad mynta ka samoi bad la sakhi ba ka jingiakhun ka long kaba iakhaid bor kaba la pynhun ruh ia ki nongwanpeitkai. Watla baroh 2 kynhun ki la sdang ban ia pyni bor naduh ba sdang ka minit ialehkai hynrei baroh arliang ki khlem kynran dien haduh ban da kut ka minit ialehkai.
Mar syn sdang ka jingialehkai, ka Mawlai ka la ioh ban pynkhih jar tang hapoh 3 minit lyngba u Khrawkupar Jana, hynrei ka Rangdajied khlem da pyni ia ka jingduhbor ki la ioh ban pynphai noh tang ha ka minit ba 4 lyngba u Balamlynti Khongjee. U Khrawkupar uba la sdang ban ai mynsiem ia ki rangialehkai ka Mawlai da ka kol na nyngkong, sa shisien u la ioh ban thep biang sa shi kol ha ka minit ba 13.
Hadien ka kylla step, ka Rangdajied ka la ioh ban thep sa shikol ha ka minit ba 77 lyngba u Manbha Iawphniaw hynrei lyngba ka jingiakhun dohiap, ka Mawlai ka la ioh ban pynphai biang tang hapoh shi minit, kata ha ka minit ba 78 lyngba u Fairming Suting. Ka jingiakhun ka la kut noh ha kaba ka Mawlai ka la ioh ban khur 3 poiñ da ka jingjop da 3-2.
Ka jingiakhun na ka bynta lashai ka sngi ka 19 Tarik Risaw kan long hapdeng ka Nongrim Hills SC pyrshah ia ka Sawmer SC ha ka por 11:50 ha madan SSA, Polo Shillong.
