Ka Department of Post India , Meghalaya Post Division, mynta ka sngi ka la pynlong ia ka Philatelic Exhibition Meghapex 2024 kaba ar sngi ha State Convention Centre Shillong, ha kaba mynta ka sngi la ioh ban pynlait paidbah ia ka Special Cover jong ka Khasi Hills Autonomous District Council (KHADC) ha ka jingiadon ryngkat u CEM ka KHADC, Bah Pyniaid Sing Syiem, u Chief Postmaster North East Circle u Sanjiv Ranjan, ka DGP ka Meghalaya, Kong I. Nongrang , ki EM ka KHADC ki khynnah skul ki nonghikai bad kiwei Kiwei.
Haba kren sha ki ladpatahi khubor, na ka liang u Bah Pyniaid Sing Syiem u la ong ba kane ka Program ka long ban pyni paidbah ia ki Stamp, bapher bapher kiba naduh ki por kham mynshwa, bad ki por mynta bad ki don ki Stamp kiba na Ri India bad na bar ka Ri, bad kaba kham long kongsan mynta ka sngi ka long ka jingiohrung, ka KHADC hapoh ka Postal jong ka Ri India, kum ka Special Cover kaba la print 2000 tylli .
“Mynta ka sngi la ioh ban soi ia kane ka Special Cover hapdeng kong nga kum u CEM ka KHADC bad u Postal Master jong ka North East Circle, ka ban phah sha ka National Museum Delhi, bad na ka liang ka Post Office kan phah sha KHADC ban ioh ban die ia kine ki Stamp na ka Council bad ka Council ruh kan ioh ban pyndonkam ia kine ” ong u Bah Pyniaid Sing Syiem.
Shuh shuh la bynrap “Nalor kane ka jingmyntoi hi ba ka Autonomous District Council ka ioh ka long halor ka jingioh jingithuh na ka Ri India baroh kawei ia ka KHADC, bad ha kane ka Special Cover la batai halor ka KHADC da ka ktien Hindi, English bad ka ktien Khasi, kaba long kum shibynta ban ioh ka jingithuh ia ka ktien Khasi”.
U la ong ba ia ka Special Cover lah ban print tang shisien, bad kane kan wanrah jingmyntoi ia kiba lum ia kane ka Stamp, namar wat mynta ka dor ka long 50 tyngka hynrei hadien 15-20 snem kan wanrah ia ka jingkiewdor ia kane ka Special Cover.