U Bah Pyniaid Sing Syiem, uba long u MDC ka Sohryngkham Constituency bad u Chief Executive Member (CEM) ka Khasi Hills Autonomous District Council (KHADC) yn sa mih iakhun noh na Nongthymmai Constituency ha ka MDC Election ka ban sa wan.
Katkum ki khubor ba la ioh, la iathuh ba ym don jingeh eiei ban jop na Sohryngkham Constituency lada u iakhun na kane kajuh ka Constituency, khamtam mynta ba ki nongshongshnong kane ka Constituency, ki la iohmad ia ka jingleh u MLA ka VPP, hynrei ka jingthmu u Bah Pyniaid Sing Syiem ban iakhun ia ka MDC na Nongthymmai Constituency, ka long namar ba u dei u nongshongshnong ka Nongthymmai Constituency, kumta kan pynsuk ia u ban ioh ai ka jingshakri kaba janai ia ki nongshongshnong.
Nalor kane, la iathuh ruh ba ka don ka jingpynbor na ka liang ki nongkyrshan u Bah Charles Pyngrope MLA ka Nongthymmai, ki nongkyrshan u Bah Latiplang Kharkongor (bam kwai dwar u Blei) u MDC ka Nongthymmai bad ki nongkyrshan ka United Democratic Party (UDP) na Nongthymmai bad ki kwah ba u Bah Pyniaid Sing Syiem ba un iakhun noh ia ka MDC Election na Nongthymmai Constituency.