Ki Nongialam ka HITO, bad ka Jaintia Women Council (JWC) hynne ka sngi ka 22 tarik Risaw 2024 ki la tur sha Meghalaya State Pollution Control Board (MSPCB) ban pynpaw ia ka jingpyrshah jong ki ia ka jingpynlong ia ka public hearings jong ka Meghatop Cement Pvt. Ltd. ha kine ki sngi ba la dep.
Na ka liang ki Nongialam jong kine ki seng hadien ka jingiakren bad ki majistor ki la ioh ban leit ia kynduh ia u Member Secretary ka MSPCB u Dr. GH Chyrmang, MFS bad aiti ha u ia ka dorkhas.
Haba kren bad ki nongthoh khubor hadien ka jingiakynduh bad u Member Secretary ka MSPCB u President ka HITO u bah Donbok Dkhar u la ong ba kat kum ka jingthmu bad ka jingmut ka jong ki ban ia kynduh ia u Member Secretary, na ka Liang ka jong ki ,ki la ioh ban aiti ia ka dorkhas ha u bad u la kular ban pynpoi noh ia ka sha Delhi ha kine ki sngi.
U President ka HITO u la bynrap da kaba ong ba na ka liang jong ka seng ka la aipor shi taiew bad lada kim ioh ka jubab, kin sa shong jingïalang ban shim ia ka sien jam kaba tyngeh.
Shuh shuh u la ong ba kin sa peit kaei ka ban mih na kane ka jingai jingthoh bad lada kam biang ka jubab kin sdang shuwa da ka jingiakhih bad lada kam poi shaei shaei kin sa leit sha ka High Court, ka HITO haba ka la sdang kan pynkut beit.
Na ka Liang u Member Secretary ka Meghalaya State Pollution Control Board u Dr. GH Chyrmang haba kren bad ki nongthoh khubor hadien ka jingiakynduh bad ki Nongïalam ka HITO, JWC bad MIWC u la iathuh ba kine ki Nongialam ki la aiti ia ka dorkhas ha u bad pyntip ba ha kato ka sngi ba pynlong ia ka Public Hearing jong ka Meghatop Cement kim shym la iohlad ban ia shim bynta ha kato ka public hearing, bad buh jingkylli halor ka jingdon bynta jong ka Board, ha kaba na ka liang ka jong u, u la pynshai ba kim don bynta eiei hynrei ki dei tang ban iarap ia ki Deputy Commissioner bad ki wei kiba don bynta lang lane ki briew kiba la phah da ka ophis jong u Deputy Commissioner.
Shuh shuh u la iathuh ba baroh ka shong ha ka Ministry of Environment, Forest and climate change, u la iathuh ruh ba ia kine ki jingujor na ka liang ka jong ki, kin sa phah sha ka ministry. Kino kino ki jingbthah na kane ka tnat kin sa pyntip.