Ka Jaiñtia National Council (JNC) 7 Shnong Circle mynta ka sngi ka 22 October 2024, hapoh ka jingialam u bah Mehi Rymbai ryngkat u President ka 7 Shnong Circle bad ki dkhot jong ka, kila leit ban buddien biang ha kaba iadei bad ka jingkieng nar kaba don hapoh ka Shnong Moolamanoh EJHD ia kaba la tip kyrteng kum ka “Lyngkeiñ Um-su-wai” na u EE bah E. Kharnaïor ka PWD NEC Khliehriat Division East Jaiñtia, naka bynta ban ioh ia ka jingtip kaba kham bniah ha kaba iadei bad ka jingdawa jong ka seng ban shna maramot noh ia katei ka jingkieng.
Kum ban shu pynkynmaw ba ka seng ka lah dep ban buh ia bun tylli ki jingthoh sha ki bor kiba halor haki snem ba la dep bad kumjuh sha u EE ha ka 7 tarik December 2023, ban dawa pynshna noh ia katei ka jingkieng kaba lah jot lah pra bad kaba buh jingma ruh iaka leit ka wan jong ki paidbah khamtam ki Paidbah ka 7 shnong.
Katei ka jingkieng kaba jrong kumba 140 meter ka dei ka jingkieng kaba jrong tam ha East Jaintia Hills, bad ka dei ka jingkieng kaba pynïasoh ïa bun tylli ki shnong kynthup ïa ki 7 shnong na Ladrymbai sha Moolamanoh, Mulang, Musniang, Musniang Rim, Moo-Nongtdu bad Lumputhoi nalor ki San Shnong kiba kynthup ïa ka Mutong, Cham Cham, Lum Shyrmit, Mukhaialong bad Pynthorsale hashwa ba kan pynïasoh biang bad u surok bah National Highway NH-6 ha Kongong.
Haka jingiakynduh bad u EE, ka seng ka la ioh iaka khubor kaba bha ha kaba u EE ula pyntip ba naka liang ka tnat PWD dang ha kane ka 14 tarik October ka la pynbna paidbah da kaba khot tender ban shna noh iaka jingkieng Um-Su-Wai bad ka sorkar kala mang tyngka ruh iaka jingshna jong katei ka jingkieng kumba 19 klur 20 lakh tyngka bad iaka por ban pyndep iaka jingshna kadei hapoh 24 bnai naduh ba pynmih iaka final work order, shuh shuh u EE ula ong ba ka tnat kan sa ialeh ban pynmih iaka final word order haka taiew ba nyngkong u December 2024 ban ioh shna noh kloi iaka jingkieng.
Naka liang jong ka seng ka dap da ka jing sngewnguh ia ka tnat PWD halor ka jingshim khia ka jong ka ban pynurlong ia katei ka kam kaba long ka jingangnud jong u paidbah ka 7 shnong da ki phew phew snem bad ka seng ka ai khublei ruh ia u EE ka PWD NEC Khliehriat Division ia ka jingshimkhia ka jong u halor katei ka kam naduh ka jingsdang ka jingdawa jong ka seng.
