Ka ophis jong u District Medical & Health Officer (DM&HO), East Jaiñtia Hills District mynta ka sngi 22.10.2024, ka la plie paidbah ïa ka jingrakhe ïa ka National Deworming Day ha ka prokram kaba la pynlong ha Rymbai Government Secondary School, Rymbai East Jaiñtia Hills District.
Ha kane ka prokram la wan ïashim bynta da u DM&HO Dr D. Shylla, Medical and Health Officer, Rymbai PHC, Dr (Mrs) S. Rymbai, Health Educator Rymbai PHC, Smt. D. Kshiar, ASHAs, nongtrei ka koit ka khiah, ki ASHA, ki nonghikai, ki samla pule bad kiwei kiwei.
Haba ai jingkren ha kane ka jingialang, u District Medical Health Officer ka East Jaintia Hills District u Dr D. Shylla u la ong ba ka National Deworming Day ka dei ka sienjam jong ka koit ka khiah ha ka ri India kaba thmu ban sumar ia ka jingpang wieh ne ki wieh (Worm) kiba don ha ki khynnah ha ka rta kaba 1-19 snem na ka ban pynduna ia ka ka jingduna snam bad pynkhlain ia ka jingbam. Nalor kata, u la pynpaw ruh ba ka jingdon jong ki khniang hapoh ka met ka lah ban wanrah ïa ki katto katne ki jingpang kynthup ïa ka jingduna bam bad ka jingduna snam bad u la ai jingmut ïa ki samla ba ki dei ban dih ïa ka um ba la sep shet man ka sngi bad ban bam ïa ki jingbam kiba tei met bad kiba khuid.
Ka Medical and Health Officer, Rymbai PHC, ka Dr (Mrs) S. Rymbai ha ka jingkren jong ka ka la pyni nuksa ïa ki rukom bapher bapher ha kaba ki kynja khniang ne ki wieh ki lah ban rung sha ka met ki briew, kiba lah ban wanrah ïa ki jingpang bapher bapher.
Ha kane ka prokram, ka Health Educator ka Rymbai PHC ka kong D. Kshiar ka la pyni da ka screen sha ki khynnah skul ha kaba iadei bad ki hynriew tylli ki rukom sait ne kumno ban pynkhuid ia ki kti. Kiwei kiba la ai jingkren ha kane ka prokram ki long u DPM, NHM, East Jaiñtia Hills District, u A. Dhar, u Manager ka RBSK, NHM, East Jaiñtia Hills District, ka kong D. Passah, nonghikai ka Rymbai Secondary School, Rymbai kong S.L. Dkhar.