Ka lympung ïalehkai phutbol jong ka kyrdan 1st Division bala pynïaid da ka East Jaiñtia Hills District Football Association kaba la long ha kane ka sngi 23 tarik u Risaw ha madan Artificial Turf, Diengshynrum, Khliehriat.
Haba phai sha ka jingïakhun ba nyngkong mynta ka sngi ka kynhun ïalehkai jong ka Iatyllilang SC Hingaria kala pynliem da 3-1 kol ïa ka Pamrakmai SCSC, ïa ki kol na ka Iatyllilang SC Hingaria la thep da u Joshwa Surong haka minit ba 25, u Senchet Lamin haka minit ba 44 bad u Filter Lapasam haka minit ba 76. Ïa ka shikol na ka Pamrakmai SCSC la thep da u Arwi pohti (Own Goal) haka minit ba 18.
Katba ha ka jingïakhun kaba ar hapdeng Mukhaialong SCSC pyrshah ïa ka Shilliang Umshong SC kila poi sha ka jingïakhaid da mar shikol 1-1, ïa ka kol na ka Mukhaialong SCSC la thep da u Fairme Kyndait haka minit ba 17, na ka liang ka Shilliang Umshong SC la thep da u Hemanjoi Khongsai haka minit ba 43.
Ka jingïakhun ha ka sngi nyngkong 25 tarik u Risaw kan long hapdeng ka Khliehriat West FC pyrshah ïa ka Wahiajer Narpuh YSSC ha ka por 12 baje mynsngi, katba ka Diengshynrum SC kan ïakhun pyrshah ïa ka Byndihati CSC ha ka por 2 shiteng nohphai sngi.