Ka kynhun Myntri jong ka sorkar jylla ba la khlieh da u Myntri Rangbah ka jylla, u Conrad K. Sangma mynta ka sngi ka 23 Tarik Risaw 2024, ka la pynlong ia ka jingialang ha Resubelpara, North Garo Hills kum shi bynta ban pyntreikam ia ka ‘Cabinet on the Move initiative’ ka kynhun Myntri ka la mynjur ia ki katto katne ki mat.
Ka kynhun Myntri mynta ka sngi ka la mynjur ia ka Meghalaya Private Medical Institution (regulation of admission, fixation of fees and reservation) Ordinance, 2024 bad ia ka Meghalaya Medical College Regulation and Admission sha ka MBBS course, 2024.
Haba kren halor kane ka rai, na ka liang ka Myntri ka Koit ka khiah, ka Kong Ampareen Lyngdoh ka la iathuh ba ka kynhun Myntri ka la pdiang ia kane ka Ordinance bad kan sa iakynduh biang ban thaw ia ka Regulatory Body 2024. Kane ka ordinance kan treikam hadien ba la soi da u Lat ba donburom ka jylla.
“Ia kane yn sa pyntip sha ka komiti pyniaid bad katkum kata ka jingpynbeit ia ki bai lutksan, ka jingpyntreikam ia ka polisi buh kyrpang bad ka jingai jaka katkum ki kyndon jong ka sorkar bad ba la ialam da ka rai jong ki ïingbishar bapher bapher kan long kaba treikam” la ong ka Kong Ampareen.
Shuh shuh ka la bynrap da kaba ong “ka USTM (PA Sangma Medical College) kan treikam shen hadien ba la soi ïa ka Ordinance da u Lat ka Jylla, ïa kaba yn sa pyntip thikna”.