Ka klob Shillong Lajong FC ka la mad biang ia ka jingjop hynne ka sngi ka 24 Tarik Risaw ha ka jingiakhun pyrshah ia ka Rangdajied United FC ha madan SSA stadium Polo Shillong.
Ka Lajong bad ka Rangdajied kiba dei kiwei na ki kynhun ba khlaiñ ha kane ka samoi jong ka lympung Shillong Premier League (SPL) ki la pynkut ia ka wat ba ar jong ka jingiakhun ha kaba ka Lajong ka la pynliem ia ka Rangdajied da 2-1.
Lah ban ong ba kine kidei ruh ki kynhun ba ki paidbah ki kham ieit ban leit sakhi bad ban leit ai ka jingkyrshan.
Haba phai sha ka jingiakhun, la sakhi ba ka long kaba i shongkun namar ka jingdon ia ki snar ïalehkai kiba tbit na baroh ar tylli ki kynhun. Ka Lajong watla kam sei madan ia ki ‘rangialehkai kiba la kham tbit bad kiba la ialehkai ha ka lympung Durand Cup bad I-League hynrei ka don pat ia ki samla ïalehkai don sap kiba lah ban pynioh jingjop ia ka kynhun.
Ia ki kol na ka bynta ka Lajong la ioh ban thep da u Samchaphrang Lato ha ka minit ba 26 bad ia kawei pat ka kol la ioh ban thep da u Emanbha Marbaniang ha ka minit ba 80, uba la mih bujli (substitute) hadien ka kylla step, katba ia ka kol na ka bynta ka Rangdajied la ioh ban thep da u Benny V. Khriam ha ka minit ba 54.
Lyngba kane ka jingjop, ka Lajong ka la ioh mynta 6 poiñ katba ka Rangdajied ka khlem pat ioh poiñ (0) hadien 2 tylli ki jingïalehkai.
Ka jingiakhun na ka bynta kane ka lympung ba la pyniaid da ka Shillong Sports Association (SSA) kan bteng biang ha ka 30 Tarik mynta u bnai ha kaba ka Laitkor kan ïakhun pyrshah ia ka Sawmer ha ka por 11:50 mynstep bad ka jingiakhun ha ka por 2:30 janmiet kan long hapdeng ka Langsning pyrshah ia ka Nangkiew Irat.