Ka klob Shillong Lajong kaba dang pynkhreh mynta na ka bynta ka lympung I-League 2024-25 ka la nang ïai pynskhem shuh shuh ia ka kynhun da kaba wanrah ia ki ‘rangialehkai na shabar Ri na ka bynta ka jingangnud ban ioh rah ia ka nam lahduh bad ban ioh rung (qualify) sha ka lympung ba heh tam ka Ri, kata ka Indian Super League (ISL).
Ha kane ka kynti, ka Lajong ka la soi ia u Imanol Arana Sabada, u rangialehkai Pdeng (Midfielder) na ka Ri Spain uba la don bynta ruh ha bun tylli ki klob Spain. Ka jingwan iasoh une u rangialehkai ba dang 27 snem ka rta ha ka Lajong kadei hadien ba u la mih noh na ka klob Namdhari Sports Club, Punjab kaba dei ruh ka klob kaba don mynta ha ka lympung I-League.
Ka Lajong ka don ia ka jingkyrmen lyngba ka jingwanrah ia ki rangialehkai na shabar Ri kan kyntiew ia ka klob bad kan iarap ruh ia ki samla ïalehkai na kane ka Jylla ban kham tih jylliew ha kane ka jait jingialehkai bad ban iohi ia ka buit ialehkai ba thymmai jong ki.