Kum shibynta ban kyntiew ia ka rep Sohphlang, ka Mawkynrew Sohphlang Eco-Cultural Indigenous Society (MSECIS) ha ryngkat ka jingkyrshan ka tnad Basin bad ka tnad Tourism ha ka 25 Tarik Risaw 2024, ka la pynlong ia ka Sohphlang festival ha madan Phutbol Jongksha, ha kaba la wan ban plie da ka Myntri ka tnad rep ka riang ka Sorkar Jylla, ka Kong Ampareen Lyngdoh.
Haba kren ha ka jingïalang, ka kong Ampareen Lyngdoh ka la pynpaw ka jingsngewkmen ia kiba la don ryngkat bad don bynta lang baroh ha kaba la lah ban pynlong ia kane ka Tamasa kaba jop bad bynrap ba kane ka Tamasa kan dei ban pynlong man u snem.
Ka la kdew hangne ba u Sohphlang um dei tang u mar bam tynrai hynrei u dei uta u jait jingthung ia uba la pyndonkam ha kaba shna dawai ban ioh jingkoit nalor ka jingpyndonkam ia u ha ka niam ka rukom bad ka riti dustur u Khasi.
Ka la ong shuh shuh ba ka Mawkynrew kadei ka dong ka thaiñ kaba la kyrkhu da ka mei mariang, lyngba ki jaka jngohkai kiba don ha kane ka thaiñ.
Na ka liang kiba pynlong ia kane ka Tamasa ki la ong ba kane ka Tamasa ka ai ka lad ia ki nongshong shnong ban ialong kawei bad iasnoh kti lang ban pynshongkun ia ka.
Kane ka tamasa ka long ruh kum ka rynsan ia ki khun samla ban pyni ia ki sap ki phong kiba ki don la ka long ha ka shad ka rwai, ka put ka tem nalor kiwei.
