Ka lympung ïalehkai phutbol jong ka kyrdan 1st Division bala pynïaid da ka East Jaiñtia Hills District Football Association kaba la long mynta ka sngi Saitjaiñ 26 tarik u Risaw ha madan Artificial Turf, Diengshynrum, Khliehriat.
Haba phai sha ka jingïakhun ba nyngkong hapdeng ka kynhun ïalehkai jong ka Bataw YWSC pyrshah ïaka Lumshken SC kila poi sha ka jingïakhaid da mar 2-2 kol, ïa ki kol na ka Bataw YWSC la thep da u Jesper Lamare haka minit ba 38 bad u Marbud Suchiang haka minit ba 70. Ïa ki kol na ka liang ka Lumshken SC la thep da u Baleski Lamo haka minit ba 59 bad u Kiarbes Lyngdoh haka minit ba 82.
Katba ha ka jingïakhun kaba ar hapdeng ka Tpepswer SSWO bad ka R.Wahshnong SC kine ruh ki kynhuh kila poi sha ka jingïakhaid da mar 1-1 kol, ïa ka kol na ka Tpepswer SSWO la thep da u Chemi Suchiang haka minit ba 8. Na ka liang ka R.Wahshnong SC la thep da u Omebiang Lyngdoh haka minit ba 12.
Ka jingïakhun ha ka 29 tarik u Risaw kan long hapdeng ka Moolamanoh SC pyrshah ïaka R. Synrangshahkhain SC ha ka por 12 baje mynsngi, katba ka Wahiajer Narpuh YSSC kan ïakhun pyrshah ïaka Jalyiah UTD SC ha ka por 2 shiteng nohphai sngi.