Ka seng jong ka Meghalaya Commercial Truck Owners & Driver Association (MCTODA) mynta ka sngi ka 26 tarik Risaw ki la lum ia ka jingialang halor ka jingkhang ia ka surok na lad Mawmaram sha lad Umsaw Damsait.
Haba kren sha ki lad pathai khubor na ka liang u President jong kane ka kynhun u Bah Mosklandar Marngar u la ong mynta ka sngi ba ka jingkhang jong kane ka surok na lad Mawmaram sha lad Umsaw Damsait ka dei halor ka jingmih khubor halor ka jingwanjurip jong u MP ka lok sabha na shillong u Dr Ricky J Synkon ba ka surok ka la sniew lut ba iaid ki truck high level.
Kane ka pynsngewsih ia ngi ki trai truck bad ki nongniah kali. Ha kano kano ka bynta ka ba mih ka kyntien high level ka mut ka thew beit ia ki trai kali bad ki nongniah truck namar ka paw beit ba ki truck ki dei ki high level. Kane ka pyndap da ka jingsngewsih ia baroh ki para dkhot jong ngi ba don ha ka seng ki trai truck bad ki nongniah truck namar ba pyndonkam ia ka surok na Mawmaram sha Mawlyndep i dei i jingkyrmen ba rit bha khamtam ia ki trai truck bad ki nongniah truck, baroh kine ki thaiñ ba sah sha Pynursla, Sohra, Mawsynram, South West khasi hills, Eastern West khasi hills bad West khasi Hills une u dei u budlum ia ki mynta naduh ba la khang ia ka jingkieng dam.
Shuh shuh u la ong lada ka lynti iaid ka suk ka dor jong ka bai kali ruh ka duna bad ki nongdie ruh ki die ha ka dor ba duna. Lada ngi shim bai kali ba heh ki nongdie ruh ki hap die ha ka dor ba rem. Ka jingbym lait shuh ban iaid na lynti dam ka dei kawei ka jingkiewdor jong ka bai kali. Ngi hap ban iaid na Mawmaram namar ka shim por 3 kynta bad lada ngi iaid na Mawrynkneng ka shim por ia ngi ar sngi ban poi bad ka dor jong ka bai kali ruh kam iahap shuh bad ngi hap ban iakhih lada ngi pan ia ka dor ba rem mano ban jynjar jynjar un dei hi u paidbah.
Ngi pynlong ia kane ka jingialang ruh dei halor ka jingkhang ban iaid na Mawmaram bad kaba pynsngewsih eh ka dei namar ki truck ba iaid na kane ka lynti ki dei ki truck high level.
Ngi thied ia ki truck ban kit ia ki mar da ka umsyep lajong ym dei ba ngi kit ia ki mar jong ki high level. Ki high level lei lei kim don bad kim buh truck hi ruh, bad ka kyntien high level ka dei ka hamsaia ba wat ma ngi ruh ngim lap ia kata.