Khliehriat: Mynta ka janmiet ka seng Jaiñtia Students’ Movement (JSM) Central Body ka la pynlong da ka jingthang mombati ha jan u mot sahnam jong u Kiang Nangbah ba don ha DC Office Khliehriat, kane ka long kum ka dak ka jingsngewsih bad pynrem jur ia ka Sorkar bad ia ka tnat Pulit jong ka sorkar jylla kaba la don kti ha kaba siat iap ia u bah Cherishterfield Thangkiew, ha iing sah jong u ha Mawlai Kynton Massar.
Ha ka jingialang ba lyngkot la ioh ka jingduwai lyngkot na u President Eastern Region bah Wellson R D Siangshai pynbud sa ka jingkren pynrem bad sngewlem ia ka iing ka sem jong i bah Che na u President Rangbah Bah Leningstar Rymbai kumjuh na i Secretary Central Body ma R.Dkhar.
Na ka liang ka JSM ka la buh ki jingdawa kumne harum:-
1. Ka sorkar ka dei ban pyntikna bad pynshai balei la siat iap ia u bah Che.
2. Ka sorkar ka dei ban Suspen ia ki to ki Pulit ba hiarthma bad pyniap ia u bah Che.
3. Ka sorkar kadei ban phah hiar shuki ia u ma Lahkmen Rymbui na ka Kam Pohing.
4. Ka sorkar ka dei ban aiti ha ka CBI ban tohkit ia kane ka jingjia.
Shuh shuh ka seng ka ong ba lada ka sorkar kam lah pynhun ia u Paidbah ka Khasi Jaiñtia ne ia ka jylla hi baroh kawei, ka jubab ia ka sorkar ba nangne sha khmat man la u snem ha ka sngi Independence Day kan dei noh ka Black Flag Day bad kata kadei ka sngi jong i bah Cheristerfield Thangkhiew. Ha kane ka janmiet la iashim bynta lang da ki Nongialam bad dkhot jong ka Seng.
