Ka Red Ribbon Club (RRC), Jaiñtia Eastern College, Khliehriat ryngkat ka jingïatreilang bad ka Kyrmen Foundation Lad Rymbai bad ka Meghalaya AIDS Control Society (MACS), Shillong, kum ka thong ban pynsngewthuh paidbah halor ka jingktah jong ka jingdih drok ne ka (Drug Abuse and Illicit Trafficking), mynta ka sngi jong ka 28.10.2024, ki la pynlong ïa ka jingïaid paidbah ne Rally ha Khliehriat, East Jaiñtia Hills District.
Ha kane ka jingïaid paidbah, la ïashim bynta da ka khynnah skul bad ki nonghikai, kaba la sdang na Khliehriat East Parking Lot bad pynkut noh ha ka madan ïalehkai jong ka Khliehriat Higher Secondary School, hadien kane bud sa ka prokram pynsngewthuh shaphang ka jingpang HIV/AIDS kaba la buh ïa ka phang “United for a Healthier Future: Combating Drug Abuse and HIV/AIDS” kaba la sakhi lang da u myntri ka ka sorkar jylla u ma Kyrmen Shylla kum u kongsan ha ryngkat ka jingdonlang u Principal Jaiñtia Eastern College, u Dr. P. Nongtdu, ka Programme Manager, Mih-myntdu Community Social Welfare Association (MCSWA), kong R. Patlong, Cluster Program Manager, Meghalaya AIDS Control Society (MACS), ma Sandy Tariang ha ka jingiadonlang kiwei de.
Haba ai jingkren ha kane ka jingialang, u ma Kyrmen Shylla, u la ai khublei ia ki nongpyniaid bad pynpaw ia ka jingkordor jong kane ka prokram kaba ka jingthmu jong ka, ka long ban pynsngewthuh shaphang ki mat kiba kongsan jong ka jingktah ka jingdih drok. U ma Shylla u la kyntu ruh ban pynphriang ia ka khubor ha kaba iadei bad ka jingktah jong ka jingdih drok. U ka kyntu ruh ia ki samla ban kiar na kaba pyndonkam palat ia ka Social Media hynrei dei ban pynlut ia ka por ha ki kam pynkilan met bad ki jingialehkai na ka bynta ka jingmyntoi jong ka koit ka khiah, kaba wan rah ruh ia ka jinglait na ka ki kam sniew khamtam ia ki jingdih pynbuaid.
La ioh ruh ki jingkren na kong R. Patlong halor ka phang, ka jingsniew kaba mih na ka jingpyndonkam ïa ki jingdih buaid, kaba la pynpaw ïa ki daw ba ki samla ki ngop ha ka jingdih buaid ki long na ka jingshah pynbor ha ki paralok, ki jingkynduh jingeh ha ka longïing, ki jingktah ha ka jingmut jingpyrkhat bad kiwei de. Ka la kren halor ka jingktah jong ka jingdih buaid, ka la pynpaw ba ka jingdih drok bad ka jingdih kyiad ka ktah ïa ka met ka phad jong u ne ka briew, ka jingmut jingpyrkhat bad ka imlang sahlang.
U Program Manager, Meghalaya AIDS Control Society (MACS), Khliehriat, ma Sandy Tariang, haba kren halor ka phang “Ka bynta jong ki samla ha kaba ïada na ka jingsaphriang ka jingpang HIV/AIDS “u la ong ka jingsaphriang jong u khniang jingpang HIV/AIDS kiba kynthup ïa ka poi kha khlem jingïada, ki thyrnia injek (syringe) ba la pyndonkam da ki juh khamtam ki nongdih drugs, ka jingai snam, ka jingsaphriang na ka kmie kaba ïoh ïa ka jingpang sha i khunlung ba dang kha, bad kiwei kiwei.
Kiwei kiba la ai jingkren ha kane ka prokram ki kynthup ïa u Principal, Jaiñtia Eastern College, u Dr. P. Nongtdu uba la ai ïa ka jingkren pdiang burom bad u Assistant Professor, Jaiñtia Eastern College u Shri B. Dkhar uba la ai ïa ka jingkren ai khublei.