U Myntri ka tnad Tourism ka Sorkar Jylla, u Bah Paul Lyngdoh u la pyntip ba hapoh 24 tarik Naiwieng 2024, yn pynkynriah lut ia baroh kiba shong dukan madan na Khyndailad sha ki 3 tylli ki jaka bala ithuh da ka Sorkar.
U Bah Paul u la iathuh ba ki don palat 200 ngut ki nongdie madan ha Khyndai-Lad kiba la ithuh bad kiba la ioh jaka sha ki 3 tylli ki jaka jong ka Sorkar ban bteng iaka kam die jingdie. Kine ki jaka ki kynthup ruh ia ka Building jong ka Meghalaya Transport Corporation bad Meghalaya Urban Development Authority (MUDA) ha Khyndai Lad.
“Palat 200 ngut ki nongdie madan kiba la ioh jaka ha Khyndailad kidei kiba pynbiang lut nadong shadong iaki kyndon ban ioh shong die madan ia kaba la bishar bniah da ka Town Vending Committee ha ka jingpeit lang da ka Shillong Municipal Board (SMB)” iathuh u Bah Paul.
Haba kylli halor ka jingbyrngem iakhih ki nongdie madan lada shah kyndang na Khyndai Lad, u Myntri u la ong ba lada ka Sorkar kan shim ne kam shim ia ki sienjam kin don beit ki briew ki ban woh daw hynrei kaba kongsan kadei ban shim ia ki sienjam kaba tyngeh ia kino kino ki mat kiba ktah ia ka bha ka miat jong ki ba-bun ba-lang.