Ka ophi jong ka District Sports Officer (DSO) ka East Jaiñtia Hills ryngkat ka jingïatreilang bad ki bor pynïaid District ki la pynlong ka jingpynkup burom ïa ki nongïoh takma ha ka poh jong ka jylla ha ka jingialehkai Athletics bad Football ha ka jingïalang kaba la long mynta ka sngi jong ka 30.10.2024, ia kaba la pynlong ha ophis jong u Deputy Commissioner East Jaiñtia Hills District.
U kongsan ha kane ka sngi u Deputy Commissioner Shivansh Awasthi, ha ryngkat ka ADC kong J.U. Kharpuri, DSO kong S. M. Rapsang bad kiwei ki riew rangbah, ki la iaroh ia kane ka jingpynkup burom ia ki nongjop takma bad ki la ai khublei ruh ia ki nongialehkai kiba la lah ban leh bha ha kitei ki jingialehkai.
U Shivansh Awasthi, u la pynpaw ïa ka jingangnud jong ka sorkar ban kyrshan ïa ki nongïalehkai trai ri lyngba ki lad bapher bapher, kum ka Talent Identification Program da ka Directorate of Sports and Youth Affairs bad ka Meghalaya State Olympic Association. U Awasthi u la pynthikna ba ka bor district ruh kan ai ka jingkyrshan katba lah na ka bynta ban kyntiew ia ka jingialehkai hapoh ka District.
Ha kane ka jingpynkup burom, la sam ia ka khusnam kaba da ka song pisa sha ki nongioh medal kiba kythup ha ka State Level Inter School Athletics Meet 2023-24, Under-14 Years (Boys) State Level Subroto Mukherjee Cup Football Tournament 2023, Under-17 Years (Boys) bad Under-12 Years (Girls) Chief Minister’s Youth Development Scheme (CMYDS) Football Tournament, 2023 bad ruh sha ki nonghikai (Athletics Coaches) kiba na kane ka District.