Dawa ka JAC-WJ ban pynkynriah noh ïa u Manager ka Dawki ICP hapoh 15 sngi, ne mad ki jingïakhih ba tyngeh

Ka Joint Action Committee War Jaiñtia (JAC-WJ) ba kynthup ïa ka WJSU, FKJGP-WJ bad ka HYC-WJ ha kane ka 29 tarik u Risaw kila shong jingïalang ha Amlarem haka jingdonlang ki nongïalam bala mihkhmat da u S. Syngkor Vice President bad U Everest R Langstang General Secretary na ka WJSU, u Bahshlur Mukhim President bad u Namdichai Lamare General Secretary na ka FKJGP-WJ, u Youdahunki Shylla President bad U Tohmondiam Mukhim na ka HYC-WJ.

Ha kane ka jingshong kyrkieh ïa ka jingïalang ka long hadien ba kila dep phah ïa ka reminder ka deadline ba la ai ïa ka Land Port Authority of India, New Delhi ban beh ne pynkynriah noh ïa u Manager ka Dawki ICP.

Hadien ka jingïalang kitei ka kynhun JAC kila shim ïa ka rai ban pynkhreh ïa ka jingïakhih lada ka Land Port Authority of India ka sngapjar sa ha kane ka reminder ne ultimatum ba la phah haka 28tarik u Risaw, 2024 ba la buh por 15 sngi ban beh ïa utei u briew.

Ka JAC kala ïa thir bha kumno kan ïaleh lada ki bor ka LPAI ki dang sngapjar halor kane ka ultimatum ka JAC War Jaiñtia

Ha kane ka jingïalang kila shim ïa kine ki rai kiba long kumne harum: kaba nyngkong ka meeting ka la thung ïa u Bahshlur Mukhim President FKJGP WJ kum u Chairman ka JAC War Jaiñtia ban pynïaid ki jingïalang ka JACWJ na ka bynta 4 bnai naduh 1^st November, 2024 haduh 1^st March, 2025.

La rai ban thung ïa i Alban K Gashnga (Chief Adviser ka WJSU) kum u Chief Adviser ka JACWJ bad ha kajuh ka por kum u Non Executive Spokesperson ka JACWJ.

Ka meeting ka la rai ba hapoh kine ki 15 sngi kin pynkhreh ïa ka jingïakhih ban weng ïa u Manager ka Dawki ICP bad ban khot jingïalang ïa ki Rangbah Shnong sawdong sawkun ka Dawki ICP. Ban khot meeting ïa ki Associations ki Exporters bad Owner & Driver Truck Association, ïa u Dolloi ka Elaka Darrang bad Elaka Nongtalang ban ïa phylliew jingmut halor kane ka mad ki jingeh ki para thaiñ ba ki ïa Kynduh.

Na ka liang ka JAC-WJ ka buh ka jingkyntu kynpham ïa ki paid ka thaiñ ban ai ka kti ka diang ka kti ka mon ban kyrshan tyngeh ïa kane ka jingdawa jong kane ka kynhun ki 3 seng kata ban beh ïa utei dkhar uba wan leh trai leh khlieh sha kane ka thaiñ ka dong ka Ri War. Kane ka long katkum ka kyrwoh ba la phah da u ma Bahshlur Mukhim Chairman ka Joint Action Committee War Jaiñtia, Amlarem.

***************************