Ka Dorbar Shnong Mukhla Nongrim ka pynlong ia ka prokram ha ka sien ba nyngkong hapoh ka Shnong Mukhla Nongrim ban rakhe ia ka jingdap 159 snem ka jingiap u Khlawait ka Rilum Jaintia u Kiang Nangbah mynta ka sngi ha phyllaw ka ïng Dorbar Hall ka Shnong, ia kane ka program la sdang naduh ka por 8:00 baje mynstep da kaba pynkhuid ia ki dong ki shnad ne pynkhuid Shnong da ki Khun Samla Shynrang bad kynthei ka Shnong.
Hadien ba la dep ban pynkhuid Shnong la pynlong ia ka Dorbar Shiphang kum ka Dak ban kynmaw burom ia une u Khlawait ka Ri. Ia ka Dorbar la pyniaid ia ka da u Vice Chairman ka Shnong u Rgh. Lunar Suna bad la ioh ruh ia ki kyntien lyngkot ka jingiathuh khana shaphang ka jingim bad ka jinglong Nongialam u Kiang Nangbah da u Rgh, Standbyme Sari uba long u General Secretary ka Shnong bad la ioh ruh ia ki jing kren na u Rgh, Bormi Sari bad khatduh la ioh ia ka jingkren na u Rgh, Buhlut Suna u Waheh Shnong ka Shnong Mukhla Nongrim uba la kren shaphang ka History bad ka jingim jong u Kiang Nangbah naduh ba u rit dang khynnah tad haduh ba un da heh ban mih shakhmat ban long u kum u Nongialam ban ialeh pyrshah bad ka Sorkar Phareng bad u la long ruh u Khlawait Kari u ba la kloi ban pha ia la ka jingim jong u ha u tyllai pasi na ka bynta ka Ri bad ka jaitbynriew jong ngi.
Hadien kane ka jingialang ba lyngkot la ioh ruh ban pynlong da ka jingiasiat khnam pyllah bad ha kane ka jingiasiat khnam ki nongiashim bynta ki don 10 ngut te ha kaba khatduh ia ka nam la ioh ban rah ia ka da u Rgh. Kor Sari ba ioh nyngkong bad u Rgh. Bram Suna u wan ba ar ha kane ka jingiasiat khnam, bad ha ka juh ka por ruh la ioh ban pynlong ia ka jingialeh kai football hapdeng ki Samla bad ki longkpa man pa. Kane ka long katkum ka jingpyllait khubor u Rgh, Standbyme Sari General Secretary ka Shnong Mukhla Nongrim.
