Ka Nongthymmai Sports and Cultural Club ka la ioh ia ka jingjop ba nyngkong mynta ka samoi na ka bynta ka lympung Shillong Premier League 2024-25 da ka jingjop pyrshah ia ka Nongrim Hills Sports and Cultural Club da 3-0 ha ka jingiakhun ba la pynlong da ka Shillong Sports Association (SSA) ha madan SSA stadium Polo Shillong.
Ka Nongthymmai bad Nongrim ki la dep ban ialehkai mar 3 sien mynta ka samoi, na kitei ki jingialehkai ka Nongthymmai ka khlem pat ioh ia ka jingjop katba ka Nongrim Hills ka la ioh shisien ka jingjop bad kawei ka jingialehkai ba la kut ha ka jingiakhaid.
Ia kitei ki 3 kol na ka bynta ka Nongthymmai, la ioh ban thep da u Michaelson Kurbah ha ka minit ba 40, Ronald Singh Shaikhom ha ka minit ba 57 bad u Istarbor Marngar ha ka minit ba 59.
Lyngba katei ka jingjop ka Nongthymmai ka la ioh 3 poiñ katba ka Nongrim ka dang neh 4 poiñ haduh kane ka sngi.
Ka jingiakhun na ka bynta kane ka lympung yn bteng biang ha ka 4 tarik Naiwieng, ha kaba ka Nongthymmai kan iakhun pyrshah ia ka Laitkor SC ha ka por 5:30 janmiet.