Ka Hynñiewtrep Women Welfare Development & Organization (HWW&DO) kawei na ki seng kynthei treimon sngewbha jong ki longkmie ka Bri U Hynñiewtrep na Ri-Lum Jaiñtia mynta ka sngi 30 tarik u Nohprah, 2021 hapoh ka jingïalam jong ka President ka kong O. Suchiang, kong B. D Lyngdoh Finance Secretary bad ka kong M. Suna Publicity Secretary ha ryngkat bad ki dkhot jong ka seng kila hiar sha madan Madiah Kmai Blai harud jong ka Wah Myntdu ha ryngkat bad ki paid nongshong shnong jong ka Ri-Lum Jaiñtia ban leit buh syntiew ha u Mot sah jingkynmaw ïa u khun dapshynrang jong ka ri bad ka jaitbynriew Jaiñtia u Kiang Nangbah.
Ka long kaba sngewmyllung bad shoh mynsiem haba pyrkhat ngam jylliew sha ki thwei jong ka mynnor, kata mynha ka 30 tarik u December jong ka snem 1962 ha kaba ki shipai ka sorkar Phareng kila sdien phasi ïa u samla Kiang Nangbah ha Iewmusiang Jowai. Tang namar ka jingieit jong u ïa ka ri bad ka jaitbynriew um kheiñ shuh ïala ka jong ka jingim bad u pyndep hok ïala ka kular hakhmat u briew U Blei daka ba shah syndon ïaka jingiap kaba shyrkhei ha u tyllai phasi.
Ka Kong Suchiang ka pynpaw ruh ka mynsiem sngewsih bad sngewkhia ba wat kat kane ka jingshah shitom shah ïap jong u Kiang Nangbah ruh ki briew Khasi Pnar jong ngi kiba im pahuh pahai hakine ki sngi kim suidniew bad kim bna ei ei halor kane. Ki iew ki hat, ki dukan, ki winestore ki dukan kyiad ki plie kumba juh long hi. “Lada ïa ka sngi 2 tarik u October ka sngi kha u Mahatma Gandhi manla u snem ngi ïashim bynta shitrhem ban khang ïaki dukan ki ïew ki hat ban kynmaw burom te balei pat ngim suidñiew be ngim bna ïa u khlawait ka ri la jong? Lada ngim burom shwa dalade ïalade ïaki riewkhraw la jong te kumno kiwei pat kin burom ïangi? Ong ka Kong Suchiang.
Haki snem kiban sawan ka Seng kan shim daka sienjam kaba kham bha bad kham tyngeh khnang ba ki paitbah ka Ri-Lum Jaiñtia bad ki mynder kiba shong basah hangne ruh kin dup peit mat ïa kane ka sngi khraw jong ka ri bad ka jaitbynriew, pynkut ka kyrwoh ba la phah da ka seng.
