Ka Federation of Khasi Jaiñtia and Garo People (FKJGP) Central Body ka la pynpaw ia ka jingpyrshah jur ia ka jingthmu jong ka Sorkar Jylla lyngba ka jingpyntip paidbah ba la pymnih na ka office jong ka Deputy Commissioner, East Khasi Hills District ha ka 30 Risaw 2024 ba yn plie noh iaka surok na Them Ïew Mawlong sha Bimola naduh ka 4 tarik Naiwieng 2024.
Ka FKJGP ka la kynnoh ba katei ka jingleh jong ka sorkar kadei tang ka buit ban pynthame ia ki paidbah nongshong shnong jong ka Bri u Hynñiewtrep ban pynslem shuh shuh ia ka jingpynkynriah noh ia ki briew kiba sah be-aiñ ha Them Ïew Mawlong.
Ki paidbah da ki phew snem na ka por sha ka por ki la pynpaw ba la donkam ban pynkynriah noh mardor ia ki briew kiba sah be-aiñ ha Them Ïew Mawlong bad ki la iai shah ruh haduh Hynriew snem kynthih, kata naduh u snem 2018 hadien ba la khangdam ia katei ka surok na ka daw ba la mih ka jingiakynad hapdeng ki samla khasi bad ki briew kiba sah be-aiñ ha Them Iew Mawlong.
Ka seng ka la ong ruh ba kam lah ban klet ia ki jingjia shah bom shah tied, ki jing shah lute, ka jing shah leh kynshleiñ bad shah leh khlem akor jong ki samla kynthei bad longkmie Khasi ha kitei ki jaka kiba ju jia na ka por sha ka por namar ba kitei ki briew kiba sah be-aiñ ha katei ka jaka ki ioh leh thik kum ki khun khatduh jong ka sorkar jylla naduh ki por kiba mynshwa ha kaba wat kita ki bor jong Aiñ ruh lada don kino kino ki jing jia ha kitei ki jaka ki ju ai jingiada pynban ia kitei ki poiwir kiba shong ba sah be-aiñ katba ia ki trai ri trai muluk kiba dei ki Khasi pat ki kylla long ki langkñia.
Ka seng ka la iathuh ruh ba wat hadien bala khangdam ia katei ka surok na Them Ïew Mawlong sha Bimola hapdeng kine ki Hynriew snem ruh la sakhi ia kiba bun ki kam bymman kynthup ruh iaka jingioh kem iaki nongdih bad khaiī Drok bad kiwei kiwei.
Ka FKJGP ka la kam ba ruh ba ka jingpynbna paidbah bala pynmih da ka sorkar jylla lyngba ka office jong ka Deputy Commissioner, East Khasi Hills District ha ka 30 Risaw 2024 kadei kaba don jingiadei sha lyndet. “Ka seng kam lah satia ban pdiang ba ha katei ka order lane kata ka jingpyntip paidbah ban kdew shai lane ban pyndonkam da ka kyntien ‘Punjabi Lane’ ha ka jaka ban kdew lane thoh ‘Them Iew Mawlong” ong ka kyrwoh kaba la wan lyngba u Bah Dundee Khongsit, President FKJGP.