U samla Praising Sumer na ka shnong Nongthymme Sehlama, West Jaiñtia Hills District, hynnin ka sngi 1 tarik u Naiwieng, 2024 haka por 9 waje shiteng mynmiet katba u dang ïaid lynti da ka kali na Khanduli sha Namdong ula ïoh kem ïa uwei u mard khlaw (Loris) uba don harud surok. Une u dei u jait mrad uba la sdang ban duhjait mynta.
Na ka liang u samla Praising Sumer lem bad u paralok jong u Edmond Pyrtuh ynda kila poi ha ka jaka ba ki khot “Riat Moobsaiñ” kila ïohi ïa utei u mrad uba dang ïaid lynti suki bha bad mar mar kila leit shajan jong u da ka jingmut ba dei i khun shrieh.
Haba kila peit thuh ïa une u mrad ula dei pynban u mrad Loris, mar mar kila leit rah ïa u sha ïing ban ïoh ai jingbam, hynrei kim tip bha kiei de ki jait jingbam kiba utei u mrad u bam, kila ai jingpyntip noh sha ki briew jong ka tnad khlaw Wildlife Division, Jowai.
Ïa utei u mrad la wan shimti da ki briew ka tnad khlaw mynta hi ka sngi 2 tarik u Naiwieng, 2024 na ka bynta ba kin ïoh leh ïa kaba donkam.
Ha ka juh ka por utei u samla ula pynpaw ka jingsngewkmen halor ka jingïoh pyllait im jong u ïa utei u mrad khlaw bad kane ka jingpyllait im jong u kala long kum ka nuksa ïa kiwei ba kin nym pynïap pathar ïa kino kino ki mrad khlaw kiba la sdang ban duh jait ha kine ki por.
