Kumba ju long ka Balang Katholik Parish Jowai ka ju pynlong shisien shisnem ka jinglehburom ia ka ktien ka jong U Blei (Baible) da ka jingiaid proseshon ia kane ka jinglehburom ia ka ktien ka jong U Blei (Baible) ha kane ka snem la pynlong ha ka Balang shnong Salini (Mihmyntdu) ha kaba palat ia ki sanhajar ngut ki paid riewngeit ki la ia wan ban shim bynta ha ka Proseshon kaba la sdang na Salini sha Reserve Police- Lad-Kiang Nangbah College bad wanphai biang sha Salini bad pynkut da ka jingkyrkhu da ka Baible bad ka Sakramen bakhuid tam ka Duwan.
Ha ka por shiphew baje mynstep la don ka jingknia Mas Iukharist (Solem High Mas) kaba la lamkhmat da u Rt. Rev. Bishop Ferdinand Dkhar ka Jowai Diocese ha ryngkat ka jingsynran lang ki Lyngdohsihblei, Rev. Hilarius Lamare, Rev. Manbha Pakem bad u Rev. Laurence Paswet, nalor ba ki paidriewngeit ki la iashim bynta shongkun shongblei la nangpynkhraw shuh shuh ia kane ka sngi da ki Heprit kiba pdiang ia ka Komunion kaba nyngkong kaba long ka Met bad ka Snam jong u Trai Jisu Khrist ha ka jingim jong ki.
U Bishop Ferdinand haba kren ha kane ka sngi u ong ba ha ka por kaba U Trai Jisu Khrist, Uba long U Blei, haba u dangiaid dangieng ha kane ka sla pyrthei u kren da lade hi ha ki briew, hynrei mynta U Blei U kren ha ngi lyngba ka Kot, ka jingthoh bakhuid ka “Ka Baible”. Nangta u ong kumno ngi pyni ba ngi ieid ia u Blei bad sngap ia ka ktien jong u, kaba ngi pyni bad sngap ia ka ktien jong u da kaba ngi pule ia ka jingthoh bakhuid (Baible) bad ym tang ba ka jingthoh bakhuid ka kren ia ngi ban ieid ia u Blei, ngin ieid ruh ialade, ia ki Paramarjan bad ia ki Paramarjngai, namar kata ngi sngewnguh ia ka ktien ka jong u Blei kaba u la ai ha ka pyrthei bad ka Proseshon kaba ngin iaid ha ka nohphai sngi ka long ka dak kaba ngi burom bad pynbna pyrthei ba ngi ieid ia ka ktien ka jong u Blei. U Bishop Ferdinand u kyntu ia baroh ban ia im sngi ban pule ia ka jingthoh bakhuid kaba long ka ktien ka jong u Blei bad ai ba ka ktien ka jong u Blei kan sawa bad ngin sngap ha dohnud ha baroh shilynter ka jingim jong ngi pynkut u Bishop Ferdinand Dkhar.
