Ka Nongthymmai Sports and Cultural Club ka la lah ban pynliem da 3-1 ia ka Laitkor Sports and Cultural Club kaba dei ruh ka kynhun kaba don ha ka kyrdan ba 3 jong kane ka lympung Shillong Premier League 2024-25.
Ka Nongthymmai ka la kiew na ka kyrdan ba 8 sha ka kyrdan ba 4 hadien ba kut noh ka jingialehkai mynta ka sngi ka 4 Naiwieng ha ka jingiakhun ba la pynlong ha madan SSA stadium Polo Shillong.
Ka jingjop jong ka Nongthymmai ka la wan hadien ka jingtbit ki rangialehkai sha khmat kiba kynthup ia u Rainold Singh Shaikhom uba la ai mynsiem ia ka kynhun da kaba pynkhih jar nyngkong ha ka minit ba 3 lyngba ka penalty bad 2 kol na u Michealson Kurbah uba la thep ha ka minit ba 36 bad 54. Na ka bynta ka Laitkor la ioh ban thep da u Fridison Wanniang ha ka minit ba 38.
Ka jingiakhun na ka bynta kane ka lympung yn bteng biang ha ka 6 Naiwieng 2024 ha kaba ka Lajong bad Mawlai kiba dei ruh ki kynhun ba khlaiñ kin sa iaknieh na ka bynta ka 3 poiñ bad ka kyrdan ba nyngkong. Kine ki kynhun ki la ioh mar 6 poiñ na 2 tylli ki jingïalehkai mynta ka samoi.