Kawei ka ïing kaba don ha Mawlai Nongkohlew ha ka dong Mission kaba hap hapoh East Khasi Hills ka la pluh lut bad ki jingdon jingem ruh ki la ingkhongkhait.
Kane ka ïing ba pluh ka dei jong i kong Phirda Kharthangmaw bad u Bah Nison Thabah ha ka shnong Nongkohlew.
Katkum ka jingiathuh jong kine ki trai ïing ka jingpluh jong kane ka ïing ka dei ha ka por mynsngi bad ha ka por ba pluh kane ka ïing la lap da ki para marjan namar kine ki trai iing kim don ki dang leit trei sha lyngkha bad don tang uwei u khun ha ïing bad ha ka por ba pluh kane ka ïing une u khun um don ha ïing u la mih noh bad u la lait na ka jingmynsaw.
Na ka liang u Bah N. Nongneng trai jaka yn ai jaka sah shipor katba ym pat dep shna ia ka ïing.
Na ka liang ka Mawlai Block Congress Committee (MBCC) khlem da pynslem mar sien iohsngew ia kane ka jingjia ba sngewsih ki la her bran bran ban mareh sha kane ka jingjia bad hapoh ka jingialam jong u President Bah Wanseng Jyrwa, General Secretary Freddy Star Thabah ryngkat bad ki dkhot ka Mawlai block congress ki la wan ban ai jingiarap ia kine ki lanot ba mad ia kane ka apot jingjia ba sngewsih bad ki kular ruh ba kin ai ia ka tin sop ïing kaba 3 ban sha kane ka longïing kaba la duh ia ka ïing ka sem da ka jingbam duh jong ka ding.
Haba kren sha ki lad pathai khubor na ka liang U President jong ka Mawlai Block Congress Committee u Bah Wansen Jyrwa u la pynpaw ba mar sien ioh sngew ia kane ka jingjia u la wan mareh ryngkat bad ki nongialam ban wan ai jingiarap ban ioh thied ia ki tiar jingdonkam namar ka jingpluh jong kane ka ding ka la bam duh lut ia baroh ki jingdon jingem jong kane ka ïing bad u kyntu ia ki bor ba dei khmih ban ai jingiarap kham kloi khnang ba kine ki briew kiba mad ia kane ka jingjia ba sngewsih kin ioh ban shong ban sah biang ha ka ïing namar ia mynta shipor kin sah ha ki ïing jong ki para marjan kiba la ai sbun mynsiem ban sah haduh ban da dep ka ïing. “Nga ai khublei ia kine ki para marjan kiba kloi ban iarap lem para briew haba mad kum kine ki jingjia ba sngewsih” la pynpaw u bah Jyrwa.