Ka Khooid Ya Ka Wah Myntdu ha ryngkat ka jingïatreilang bad ka office jong ka District Legal Service Authority, West Jaiñtia District Jowai, ka khot ïa baroh ki nongshong shnong kiba don hajan ka Wah Myntdu ban ïawan sha ka jingïalang ka ban long haka 09/11/2024 ha ka Por 01:00 PM ha ïing Dorbar ka Chilliang Raij, Jowai.
Ha kane ka jingïalang khot lang naduh ki Waheh Chnong, ki General Secretary ryngkat ki nongkitkam shnong, Shynrang bad Kynthei jong ka Dorbar shnong Mihmyntdu, ki shnong ha Jowai, ka Khliehtyrshi, Demthring, Mustem, Chyrmang, Ïongnoh, ki shnong ba don ha ka Raij Tuber, kiba don sha War Jaiñtia bad ha shilynter jong ka Myntdu, kumjuh ïa ki Rangbah bad Longkmie, ki Samla kiba don ka jingsngewkhia ban pynbha ïa ka Myntdu bad ki tyllong ki shnat ki jong ka.
Ha kane ka jingïalang u Bah W. R Kharkhrang Senior Environmental Engineer MSPCB, Shillong un sa wan ai jingkren halor ka Waste Management bad ki nongïasaid Aiñ na ka DLSA kin kren halor ka Ain SWM.
Ka seng kala pynsngew kumba la ïohi hi da la ki jong ki khmat ba ka la don ka jinglehdusmon, ka jingpynjaboh ïa ka Myntdu, da ka jingbret pathar ïa ki plastic, ki ñuit, ka jingpyntuid sha ki nala um na ki ïing bad ka jingnoh ïa ka khyndew sha ka Myntdu ha baroh shi lynter jong ka.
Kane ka jingleh ka la sdang ban ktah jur bha ïa ka jingim ka jong ngi ki briew ha ryngkat ka Myntdu, kaba bsa ïa ngi ki nongshong shnong naduh ka Um, ka lyer, ka khyndew, ka bording, u Kba ha ka Pynthor rep bad kiwei.
Na ka bynta mat kiba yn ïa kren bad ïa phylliew jingmut bha, ki long halor Ka jingshah pyndap shyiap, pyndap khyndew, ka jingbret pathar ia ki nuit ban tuid sha ka Myntdu. Ngin wad ïa ki lad ki lynti kumno ban ai jingïada ïa ka Myntdu bad ïa ngi ki Briew ba shaniah ha ka bad ïa kiwei de ki jingim.
Yn kyrpad ïa ka Sorkar jylla bad JHADC ban pyntreikam ïa ki Aiñ kiba lah don lypa bad ki kam kiba la bthah da ka ïing Bishar, ka NGT bad kiwei de.
Na ka bynta ban ïoh ïa ka jingim kaba shngaiñ ryngkatlang ka Syiem Myntdu, la kyrpad ban ïawan sha katei ka jingïalang ban ai bor, ai buit bad ai jingkyrshan ha kane ka jingthmu babha ki tawiar ka Myntdu, pynkut ka kyrwoh na u ma Khroo L Pariat, President, Khooid Ya Ka Wah Myntdu.