Ka Dorbar Tlang jong ka Jaiñtia Hills Autonomous District Council (JHADC) kala poi sha kaba kut mynta hi ka sngi jong ka 7 tarik u Naiwieng, 2024, la sdang ïa kane ka Dorbar naduh ka por 10 shiteng mynstep hapoh ka jingpynïaid jong u Deputy Chairman u ma Het Pohthmi kum u shongknor.
Haba sdang jong ka Dorbar la don ka kynta kylli jingkylli na ki nongïalam ka liang pyrshah kata u ma A. A Shullai uba la buh jingkylli haduh katto tylli ki NOC kiba la dep issue da ka District Council ban seng ïa ki Kharkhana Dewbilat hapoh ka EJHD naduh 1st October 2023 haduh 30 september, 2024 la jubab da u CEM ma Thombor Shiwat ym don bad ula kynthoh jur kumno ka Council kala issues NOC ïa kawei ka Karkhana baheh ka Meghatop hapoh ka Elaka Narpuh nalor bala don lypa kiba bun ki Karkhana.
Ula kylli ruh halor ka jingïoh lum (Revenue) ka Council na baroh ki ïew naduh ka 1 April 2023 haduh 30 September, 2024 la jubab da u EM incharge ka long T.54,24,606/- tyngka.La buh jingkylli kumjuh ha kaba ïadei bad ki dak thoh “Pnar Alphabet”, ha kaba la jubab ba ki dang ap sa ka jingmonjur na ka sorkar jylla, katba haka liang ka rukom rejister ïa ki jait Kur hapoh ka Council, ïa kane ka kam la pyntip ba ka dang ïaid shakhmat ban pdiang ïa ki kyrteng jong ki Kur kiba wan pyntip hapoh ka Council.
Na ka liang u MDC ma Brightstar Chyrmang ula kylli haduh katno ka bhah pisa ka Council kaba la ïoh na ka sorkar jylla ka jubab ka long ka T.86,63,70,500/- na ki (Major Minerals) bad T.28,94,82,996/- na ki (Minor Minerals). U CEM ula pyntip ka pisa kaba dang sah haka sorkar jylla haduh mynta kala kot sha ka 113 klur tyngka.
Ha kaba ïadei bad ki bar jylla kiba wan trei hapoh ki Karkhana Dewbilat kiba don ha East Jaiñtia la buh jingkylli ki don haduh katno ngut kiba ïoh Service License na ka Council, la jubab ba ki don haduh 4417 ngut ha ka dor 500 tyngka kawei ka Service License.
Katba na ka liang u MDC ma R. Syngkon ula buh jingkylli haduh katno ka revenue bala ïoh lum na baroh ki District Council Forest Check Point, ka jubab ka long na Ratacherra T.9,49,160/-, Mookyndur T.28,94,850/-. Sunapur T.19,96,580/-, Lumkya T.26,000/- bad ka Garompani T.9,000/-.
Na ka bynta ka bhah ba ka Council ka ïoh na ka State Transports Department jong ka Financial year 2023-2024 ka long T.8,87,80,685/- tyngka.
U CEM ka JHADC mynta ka sngi ula pynsngew ruh ïa ka Official Report ban pynkiew kyrdan ïa ki ar ngut ki ophisar ka Council. Ha kane ka Dorbar Tlang kum ka dak ban kynmaw burom ïa ki arngut ki MDC kiba la khlad noh u (L) Welcome Dkhar bad u (L) H. Britainwar Dan la pynlong ka jingsngap jar kaba shipor bad haka juh ka por ka Dorbar kala rai ban phah ruh ïa ka jingsngewlem sha kiba ha ïing jong kine ki MDC ba la khlad noh.
