Ha kaba iadei bad ka Elekshon shiteng samoi ha Gambegre, u Bah Vincent H. Pala u la ong ba ka Congress ka la iaid shakhmat ban iareng ha kane ka Elekshon bad ka don ka jingkyrshan kaba khlaiñ na ka liang ki paidbah ban pynjop ia u kyrtong ka Congress.
U Bah Pala u la ong ba kat ba dang iaid ka jingialap Elekshon ka Congress ka don hi ka jingsngewdiaw namar ba na ka liang ka NPP ka la sdang ban pyndonkam da ki bor Sorkar ban pynjop ia ka kyrtong ka NPP da ka ba ai da ki skhim sha ki paidbah.
Ha ba iadei bad ka MDC Elekshon, u Bah Pala u la pyntip ba ka Congress ka la long kaba la pynkhreh khamtam ha East Khasi Hills na ka bynta na MDC Elekshon ka ba don 29 seat, ka Congress ka la ioh 23 ngut ki kyrtong bad kiwei pat ki seat namar ba bun kiba pan ticket, u la iathuh ruh ba ka Seng kan dang bishar ia ki kyrtong ki ba biang.
“Kum u President hi nga la leit sha Ribhoi, West Khasi Hills, Jaintia Hills bad ki paidbah mynta ki shongshit ha ka Congress, namar haba ka Congress ka tlot ka jaitbynriew ka tlot, ka kamai ka jih ka tlot, ka imlang sahlang ka tlot hynrei haba ka Congress ka don ha ka bor ka peit lut ia baroh bad ka don ka jingiatylli lang” ong u Bah Pala.
U la bynrap “Kumba ka long mynta hi ka Congress ka la leh bha watla kam lah ban wan ha ka bor hynrei ka la leh bha bad kumjuh nga kyrmen ba ha kine ki Elekshon ban wan ruh kan dei ha ki paidbah ban ai ka bor sha ka Congress”.