Ka Hynniewtrep Youth Council (HYC) mynta ka sngi ka 7 tarik Naiwieng 2024 ka la pynlong ia ka jingialang paidbah ha Motphran ban pyntreikam noh ia katto katne ki mat jingdawa ban tehlakam halor u droks.
Ha kane ka sngi ba pynlong ia ka jingialang la wan ban synran lang da kiwei ki kynhun sengbhalang ka Jaintia National Council ki seng longkmie bad kiwei kiwei de ki nongshah khot sngewbha.
Haba kren ha kane ka jingialang na ka liang u President jong ka Jaintia National Council (JNC) u Bah Sambormi Lyngdoh u la ong “Ka jingjyllei jong u droks ha ka jylla jong ngi kam ktah tang ia u nongdih droks hynrei ka la buh ia ngi ha ka jingshongsyier naduh ba jyllei une u droks la dap sa tang ki nongtuh nonglute ha ki lynti ki synkieng bad ha ki shnong ki thaw”.
“Ka jingpang HIV aids ka nang kiew na ki por sha ki por ba la kiew palat ka jingjyllei une u droks ha ka jylla jong ngi”. Kum u wei na ki riewngeit khristan u la pynianujor ia une u droks kum u soitan bad u nongshun jong ka Jaitbynriew.
Na ka liang u President jong ka HYC Sengkmie u Bah Roykupar Synrem u la ong ba “Ka Jaitbynriew ka dang don ia ka jingkyrmen haba u dkhot jong ka Jaitbynriew u dang mih sha madan ban iakhun ia kum kine ki jingeh kaba ka Jaitbynriew ka ia kynduh ka dang don ka jingkyrmen haba ki longkmie longkpa ki dang mih sha madan ban iakhun ia kano kano ka jingeh kaba ka Jaitbynriew ka iakynduh jingeh”.
shuh shuh u la ong ba “Kane ka dei ka sngi ba ngin pynpaw sha kito ki nongsynshar ki nongialam ki jong ngi ki ba pyrkhat ba ka jingiakhih pyrshah ia ka jingjyllei ia u droks ka dei ka jingiakhih jong ka Hynniewtrep Youth Council marwei mynta phi la iohi ia u paidbah jong ka Jaitbynriew Hynniewtrep uba la wan ban lum hangne hapoh mothphran hapoh jong une u mot khlawait ka Jaitbynriew ka jingiakhun na bynta ka jingjyllei jong u droks kam dei ka jingiakhih jong ka HYC marwei ka dei ka jingiakhih na bynta ka ri bad ka Jaitbynriew ban pynduh jait ia une u droks ha ka jylla jong ngi.”
Kumta na ka liang ka seng ka la aipor 30 sngi ia ka sorkar ban pyntreikam noh ia ki jingdawa jong ka seng bad lada ka sorkar kam sngap bad na ka liang ka seng kan nym pynlong shuh ia ka jingialang bad kan tur beit direct sha Secrtariat kan ym sngap shuh ia ka sorkar.
