Ki nonghikai hapoh ka shatri jong ka North Eastern Hills University Teacher Association (NEHUTA) bad ka Meghalaya Tribal Teacher Association (METTA) mynta ka sngi ka 8 tarik Naiwieng 2024 ki la wan iakynduh ia u Lat ka jylla CH Vijaya Shankar ban pynpaw ha u halor ki kynrum kynram kiba don hapoh NEHU ha kine ki sngi.
Haba kren sha ki lad pathai khubor hadien ba la wan iakynduh ia u Lat na ka liang u Prof Lakhon Kma u la ong ba kino kino ki kynhun la ki dei ki sengbhalang ne ki political party ki dei ban leit ai jingkyrshan ia ki khynnah pule kiba shong shah thngan na ka bynta ban pynbha ia kane ka skul bah namar ka jingbymniewkor jong u Vice Chancellor u professor Prabha Shankar shukla.
Shuh shuh u la ong U Registrar bad ki Deputy Registrar kim long kiba tbit ban bat ia ka kam ha kane ka skul bah bad ki dei ban resaiñ noh ban mih noh na kane ka skul bah.
Na ka liang U Prof Lakhon u la bynrap kumba ka long mynta ka thong hi ka long ban pynhun bad pynurlong ia ka jingdawa jong ki khynnah pule ka skulbah bad kino kino ki briew ne ki seng kiba wan sha NEHU ban pyni ia ka jingkyrshan ki dei ban buh nyngkong ha ka jingmut ban isynei bad iarap ia ki khynnah kiba la shong shah thngan mynta la 72 kynta. U Prof. Lakhon ula bynrap ruh da kaba ong ba ka jingleit iakynduh jong ki dkhot jong ka VPP ia u VC ka la nang pynbitar shuh shuh ia ki khynnah pule namar kumba la tip ba kane ka daw bad ka jingeh ka mih dei na ka jingleh thok bad bym niewkor jong u Vice Chancellor ka skulbah NEHU.
U Prof. Lakhon ula ther ruh ia u Vice Chancellor da kaba ong ba um don ka jingpyrwa katba tang shi kyntien um patiaw ban kylli ia ka jinglong jingman jong ki khynnah kiba la pynlong ia ka jingiakhih ha phyllaw ka ophis treikam jong u bad u Bah Lakhon ula ong ia u Vice Chancellor ba um dei ban iatynjur bor bad ki nong Meghalaya namar lada u VC um shimkhia ka lah ban don ka jinghuri hura kaba jur bad dei tang U VC hi uba dei ban shim ia ka jingbahkhlieh.
