Ka lympung ïalehkai phutbol jong ka kyrdan 1st Division bala pynïaid da ka East Jaiñtia Hills District Football Association kaba la long mynta ha kaen ka sngi saitjaiñ 9 tarik u Naiwieng ha madan Artificial Turf, Diengshynrum, Khliehriat.
Haba phai sha ka jingïakhun Quarter Final ba nyngkong ka kynhun ïalehkai jong ka Shilliang Umshong SC kala pynliem da 5-2 kol ïa ka Jalyiah UTD SC, ïa ki kol na ka Shilliang Umshong SC la thep da u Henjoymang Khongsai ha ka minit ba 31, 83 & 90, u Lhunminthang Thauthang ha ka minit ba 46 bad u Besterly Ksih haka minit ba 44. Ïa ki kol na ka Jalyiah UTD SC la thep da u Hamran Siangshai haka minit ba 7 bad u Wansalan Dkhar haka minit ba 53.
Haka jingïakhun kaba ar hapdeng ka Wahiajer Narpuh YSSC kala jop da ka jingïashut Tie Breaker da 4-1 kol ïa ka R.Wahshnong SC, haba phai hapoh jong ka por ïakhun kine ki ar kynhun kila poi sha ka jingïakhaid da mar 2 kol, ïa ki kol na ka Wahiajer Narpuh la thep da u Any Manner haka minit ba 37 bad u Justme Ryngkhlem haka minit ba 45. Katba ïa ki kol na ka R.Wahshnong SC la thep da u Meaibanteibok Dkhar haka minit ba 25 bad u Ronaldo Poit haka minit ba 81.
Lyngba kane ka jingjop jong ka Shilliang Umshong SC & Wahiajer Narpuh YSSC kila ïoh ban rung sha ka Semi Final jong kane ka kyrdan 1st Division EJHDFA.
Ka jingïakhun Quarter Final ha ka 13 tarik u Naiwieng kan long hapdeng ka Diengshynrum SC pyrshah ïa ka Bataw YWSC haka por 12 baje mynsngi, katba ka Iatyllilang SC Hingaria kan ïakhun pyrshah ïa ka R.Synrang Shankhian SC haka por 2 baje shiteng nohphai sngi.