Ka jingiakhih da kaba shah thngan jong ki samla pule ka Skulbah NEHU, ha ka 12 Tarik Naiweing kala kynjoh sha ka 8 sngi ha kaba na ka liang ki samla pule ki dang bteng haduh mynta ka sngi ka 12 Naiwieng tad haduh ba u Vice Chancellor (VC) ka NEHU u Prof P.S. Shukla un hiar shuki.
Lah ban kdew hangne ba na ka liang ki samla pule jong ka Skulbah NEHU ki la sdang ia ka jingiakhih da kaba shah thngan naduh ka 6 Tarik janmied bad hapdeng kine ki 8 sngi , 12 ngut ki samla pule hap ban leit sha hospital hadien ba ka jingkoit jingkhiah jong ki ka la sdang ban sniew.
Nalor kane ka jingshahthngan, ki samla pule ki la pynlong ruh ia ka jingkhangdam kaba khlem buh por ia kane ka Skulbah.
Haba kren sha ki lad pathai khubor, u President ka KSU NEHU, Sandy Sohtun u la ong ba baroh ki samla pule ka NEHU bad ki samla pule na ki jaka pule bapher bapher na Meghalaya bad shabar ka jylla ki la ai ka jingkyrshan ia ka jingiakhih kaba dang iaid ha NEHU.“Wat hadien 8 sngi ka jingshah thngan, ngi dang skhem beit ha ka jingdawa jong ngi ba u Vice Chancellor (VC) u dei ban hiar shuki noh bad u dei ruh ban weng noh ia u Registrar, u Deputy Registrar bad ia ki Ophisar kiba don ha ka kam kyrpang (OSD)” ong u Bah Sohtun.
U Bah Sohtun u la pyntip ba ïa ka shithi na ka liang ka NEHUTA ka MeTTA bad ka NEHUSU la dep ban phah sha ka President ka ri India bad sha u Myntri Sorkar Pdeng ba ki dei peit ïa ka tnad pule puthi, ban pan jingïarap ban weng ia kane ka jingeh ha NEHU.
Shuh shuh u la bynrap “Watla ngim shym la ioh kano kano ka jingkhot kaba pura na u Lat hynrei ngi khmih lynti ba shen, u Lat un khot ia ngi na ka bynta ban iakren halor ka jingkulmar kaba mynta ha NEHU”.