Ka All India Football Federation (AIFF), kaba dei ruh kaba pyniaid ia ka lympung ha India kaba kynthup ia kane ka lympung Indian League lane I-League ka la pyntikna ia ki program ïalehkai bapher bapher na ka bynta ka samoi ïalehkai jong u snem 2024-25 kynthup ia ka Shillong Lajong kaba dei ruh ka klob kaba mihkhmat na kane ka Jylla sha katei ka lympung kaba heh.
Ia kane ka lympung yn sdang ha ka 20 Tarik mynta u bnai bad yn kut ha u Iaiong 2025. Ka Lajong kan sdang ia ka jingiaid lynti ha kane ka lympung da ka jingiakhun pyrshah ia ka Klob Churchill Brothers kaba mihkhmat ia ka Jylla Goa. Kaba kham pynioh mynsiem ia ka Lajong mynta ka samoi ka long namar kin ioh ban sdang ialehkai ha la ïing (home game). Lyngba katei ka jingioh kabu ki rangialehkai ka Lajong kin ioh mynsiem shibun ban ialehkai bha bad khamtam ban pynkmen ia ki jingkyrshan na kane ka Jylla.
Ka Lajong kan ioh ban ialehkai 2 tylli ki jingiakhun mynta u bnai, kata ha ka 30 Tarik pyrshah ia ka Dempo Sports Club. Baroh 2 tylli kitei ki jingïalehkai yn pynlong ha madan SSA stadium Polo, Shillong ha ka por 7 baje janmiet.
Ka AIFF ka pynbna ruh ba kino kino ki kynhun ki ba ioh ban rah ia ka nam lahduh jong kane ka lympung kin ioh ban ïalehkai pat sa ha kawei pat ka lympung kaba kham heh ia kaba la tip kum ka Indian Super League (ISL).
Ki 12 tylli ki klob ki ban ïakhun na ka bynta ka nam lahduh mynta ka samoi ki long:1 Aizawl 2 Churchill Brothers 3 Delhi 4 Dempo 5 Gokulam Kerala 6 Inter Kashi 7 Namdhari 8 Rajasthan United 9 Real Kashmir 10 Shillong Lajong 11 Sporting Bengaluru 12 Sreenidi Deccan.