Hapdeng ka jingiaid shakhmat ka jingiakhih jong ki samla pule ka Skulbah North Eastern Hills University (NEHU) kaba la sdang naduh ka janmied jong ka 6 Tarik Naiwieng, na ka liang u Prof. P.S Shukla, Vice Chancellor (VC) ka skulbah NEHU hynne ka sngi u la thung ia 2 ngut ki longkmie kum ki Pro Vice-Chancellor jong ka NEHU Shillong bad Tura Campus.
Kine kiba ar ngut ki longkmie kiba la shah thung kum ki Pro Vice-Chancellor ki kynthup ia ka Professor SM Sungoh, kaba khlieh ia ka Department of Education kum ka Pro Vice-Chancellor jong ka NEHU Shillong Campus bad ka Professor Fameline K. Marak kaba khlieh iaka Department of Garo kum ka Pro Vice Chancellor jong ka NEHU Tura Campus.
Da ka jingthung jong u VC ia kine ar ngut ki longkmie, u VC u la lah ban pynurlong ia ka jingdawa kaba nyngkong eh jong ki samla pule ka NEHU. Ki samla pule kiba don hapoh ka lama jong ka North Eastern Hill University Students Union (NEHUSU) bala kyrshan da ka Khasi Students Union-NEHU Unit, ki dang bteng ia ka jingiakhih kaba la jam mynta ia ka 9 sngi ban pynlong ia ka jingshah thngan kaba khlem buh por.
Ia kane ka hukum la pynmih da u Assistant Registrar (Planning) kaba iaid katkum ka aiñ bad ki jingbuhbeit jong ka University.
Na ka liang ki samla pule ki dang ap ia ka jubab kaba shai na u VC ba un hiar shuki mardor watla ialade um don shuh ha kane ka Nongbah namar kane kan ktah ia ki samla kiba dang iaid mynta ha ka jingpule.