Ka KSU Wahiajer Unit kala pynlong ia ka Cleaning Drive ha ka 31 tarik jong u Nohprah ha shnong Wahiajer kaba long shi bynta ban pdiang burom ia u snem thymmai.
Ha shwa ban pynlong ia katei ka jingpynkhuid shnong kala don ka jingialang kaba lyngkot ha ophis treikam jong ka shnong Wahiajer ha kaba la iadon lang ki nongialam shnong naduh u Chairman shnong ma Samson Lamare, Secretary shnong ma Andrew Sari bad u Waheh Shnong Sanwotki Laloo.
Na ka liang ki nongialam shnong kila pynpaw ka jingsngew kmen ban iohi ba ki samla jong ka shnong kiba don hapoh kane ka seng KSU ki kloi ban iatreilang bad ki kam shnong kam thaw na ka bynta ka bha ka miat jong ka shnong ka thaw bad ki kyrmen ba ka seng kan iai bteng ka jingiatrei bad ki kam shnong nangne shakhmat ruh khnang ban wan rah ia ka roi ka par bad ka bha ka miat hapoh ka shnong ka thaw.
Ia ka jingpynkhuid la lam khmat da ki nongialam ka KSU Wahiajer Unit ba kynthup ia u President ma Rimiki Sari, Secretary ma Dayowanki Pale ryngkat ki dkhot jong ka. La sdang ia ka jingpynkhuid naduh na Iawpynsing ter ter haduh ban da poi ha Stadium Wahiajer.
Ha kane ka sngi ka KSU Wahiajer Unit kala ioh ruh ban sam ia ki tin dustbin sha ka Dorbar Shnong Wahiajer ban ioh pyndonkam hapoh ka ophis shnong kumjuh ruh ban buh ha ki rud surok. Ha kajuh ka por ka Seng ka kyntu ia baroh ki nongshong shnong ba kin long kiba leh khuid da kaba sdang shwa na la ïing bad na ki phyllaw ïing jong ki ter ter.
