Ka long ka khubor kaba sngewsih bad kaba pynbitar ia ki paidbah hadien ba la ioh ia ka khubor ba uwei u samla ia kaba la tip kyrteng kum u Hoterfiel Rymbui u la khlad noh hashen hadien ba kawei ka kali pulit (Thar) ka la tynrah ia ka Bike kaba thmu ban leit lehkmen Cherry Blossom ha Kurkalang.
Utei u samla uba la ñiah ia ka bike kaba don ia u registration no ML05 AD 0566 u la leit ryngkat bad ka paralok jong u, ka samla Daphi Kharbithai hynrei katei ka samla ka la lait noh na ka jingiap bad la mad ia ka mynsaw.
Katkum ka jingiathuh katei ka samla kaba la sakhi ia katei ka jingjia, la ong ba katei ka kali kaba la shu leh kyrkieh bad kaba pahara ia ki heh ki haiñ na ka bynta ban pynpoi kloi sha katei ka Tamasa ka la shu pynher sted bad iaid na pdeng surok. Ka la kam ruh ba katei ka jingtynrah kadei ka jingleh khnang.
Katba kane ka khubor ba sngewsih ka dang jia, ki Nongïalam ka Jylla kiba kynthup ia u Myntri Rangbah ka jylla Conrad K. Sangma, u Bah Paul Lyngdoh, u Symbud Myntri Rangbah ka jylla, Bah Sniawbhalang Dhar bad kiwei ki dang lehkmen ban plie pyrda ia katei ka Tamasa kaba heh ia kaba la wan ban rwai da ki khlur rwai ba paw ka pyrthei kynthup ia u Akon, Boney M bad kiwei.
Haba sngap ia ka jingkren ki paidbah hadien katei ka jingjia, don kiba la kylli -kaei ba ka sorkar kan ai jubab halor katei ka jingjia. Hato ka jingpynlong ia kane ka Tamasa ka long ka jingmyntoi ne ka jingduhnong, kaei ka thong ha kiwei ki snem?
