[Dawa na ka sorkar ban pynheh noh ia u surok Shillong – Jowai ban lait ka sahkut kali]
Namar ka jingjia jong ka jingsahkut kali kaba khah khah ha surok Shillong-Jowai bad kumjuh sha Amlarem na ka liang jong ka JSU kala ai da ka jingthoh sha u SP ka West Jaintia Hills na ka bynta ban kyntu ia ban shim khia halor kane ka jingeh ba ki paidbah ki iakynduh la jan man la ka sngi.
Ka seng kala kyntu ia u SP ba un bthah iaka tnat pulit ban ym ailad iaki trok kiba iaid ha surok bah ban shim pass kulmar mamar kane ka buh jingeh ia ki paitbah kiba leit kiba wan na u juh u surok. Ki jaka kiba blok khah khah kadei ka surok na Shillong-Jowai ha ki bynta ba long thieb bad ba khongwaiñ, katba sha ka thaiñ war pat ka shait jia naduh Amlarem shaduh Nongtalang namar ka jingiaid sahuh ki trok khlem da pyrkhat shuh iaki paitbah kiba iaid kiba ieng na u juh u surok bad ka seng ka dawa dei ban pynshitom lada lap ia ki trok kiba shim pass ha ki surok bah bad ka tnat pulit ki dei ban shim khia bha ban lait ki paitbah ban shem jingeh khamtam kiba leit shim dawai ne phah sumar sha hospital bad kiwei kiwei de ki kam ba kyrkieh.
Ki nongialam ka seng hadien ba ki lah ioh kren bad u SP ka West Jaintia Hills u lah iathuh ba ka jia ka jingsahkut kali ka dei ba sniew ki trok ha ki bynta jong u surok bad ka buh jingeh ban pyniaid beit iaki kali namar u surok bah na Shillong-Jowai u long u ba rit palat. Kumta ki nongialam ka seng ki kyntu ia ka sorkar ba la dei ka por ban wad ki lad ki lynti ban pynheh noh ia u surok Shillong-Jowai namar ki kali kiba iaid na une u surok khamtam ki trok ki la nang bun nang bun katba nangmih ki sngi ki por katba ka surok pat ka la khim palat.
