Ka kynhun ïalehkai jong ka Chutwakhu SC kala long syndon ka lahduh haka lympung ïalehkai ba la tip kum ka ‘12th Chatister Kharkongor Memorial Trophy’ jong ka kyrdan 1st Division Football Tournament-2024, bala pynïaid da ka West Jaiñtia District Sports Association (WJDSA) Jowai haka jingïakhun phainal mynta ka sngi Saitjaiñ 16 tarik u Naiwieng ha madan Kiang Nangbah Stadium, Jowai.
Haba phai sha ka jingïakhun Phainal hapdeng ka Chutwakhu SC pyrshah ïaka Mooknor Thadmuthlong SC kala long kaba itynnad bha, na ka liang ka kynhun ïalehkai jong ka Chutwakhu kala lah ban pynliem da 3-1 kol ïaka Mooknor Thadmuthlong, ïa kitei ki kol Chutwakhu la thep da u Luckyness Khyriem haka minit ba 65 (Penalty), u Gladio Susngi haka minit ba 82 bad u Faithful Bthuh haka minit ba 90. Katba ïa ka shikol na ka Mooknar Thadmuthlong SC la thep da u Rimiki Suchiang haka minit ba 85 (Penalty)
Ïa ki khusnam sha ki nongjop la sam da u kongsan jong kane ka sngi u ma Finely Pariat uba dei ruh u General Secretary ka Meghalaya State Olympic Association kum u kongsan, ha ka jingdonlang ki Dkhot bad nongkitkam ka West Jaiñtia District Sports Association nalor kiwei de.
Ha kane ka lympung ïa ka nam Top Scorer la ïoh rah da u Iohi Dhar na ka Mooknor Thadmuthlong uba la ïoh thep haduh (8 goals) ha baroh ki jingïakhun. Katba ïa ka Best Goalkeeper la ïoh da u Lalmalsawma Tariang. Ïa ka nam Man of the Match la ïoh da u Trerigin Tariang bad ïa ka nam Player of the Tournament la ïoh rah da u Gladio Susngi baroh lai ngut ki dei na ka Chutwakhu SC.
Kine ki ar kynhun kiba la poi sha ka phainal ka Chutwakhu SC bad Mooknor Thadmuthlong SC ki la ïoh syndon ban kiew kyrdan sha ka Super Division ka West Jaiñtia District Sports Association ha une u snem ban wan.
Ka kynhun kaba ïoh rah ïa ka nam lahduh mynta u snem 2024 kala ïoh rong ïa ka song pisa kaba 50,000/- hajar tyngka lem bad ka trophy. Katba ka kynhun ba wan ba ar kala ïoh 30,000/- hajar tyngka lem bad ka trophy.
