Ka Tamasa Cherry Blossoms kaba ar sngi Mynta ka sngi ka la poi noh sha kaba kut, kaba la pynlong ïa ki nongwan sha kane ka tamasa ban lyngngoh da ka jingïaid lynti kaba phylla jong ki jingshad, ki jingpyni ïa ka kolshor, bad ki jingïalehkai kiba sngewtynnad kiba la pynlong shisha ïa kane ka jingïalang mynta u snem kaba ym lah ban klet. Kane ka tamasa kaba ar sngi ka la khring ïa palat 50,000 ngut ki nongwan jngohkai na ka Jylla bad kylleng ki Jylla ka India ha ka shisngi, da kaba pynkmen ïa ka jingrwai, ha ka “Music Capital of India”.
Ka sngi kaba khatduh ka la long ka jingkut kaba biang bha. Ka kynhun tem jong ka ri Bilat kaba la pawnam ha ka pyrthei ka ‘Clean Bandit’ ka la pyni ia ka jingrwai kaba pynkhihwin kaba la pynlong ia ki nongpeitkai ban sngewtynnad ia ki jingrwai ba pawnam jong ki ha ka pyrthei.
Ka Kanika Kapoor, ka pawnam jong ka Bollywood, ka la pyndap ïa ka jingitynnad jong ka, katba u DJ R3HAB, uba na Dutch-Morocco, u la pynhiar dor ïa ka ïing da ki jingtem ba heh bor jong u, da kaba pynkylla ïa ka madan shad sha ka jaka shad kaba pynkhih mynsiem. Ki khlur na ka thaiñ, kynthup ïa u Khasi Bloodz bad u SK Korn, ki la ïai bteng ban tyngshaiñ, da kaba pyni ïa ka sap ba shlur jong ka Meghalaya bad pyni ïa ka jingïadei kaba jylliew jong kane ka thaiñ bad ka put ka tem.
Ka tamasa ka la sdang ha ka 15 tarik u Nailur da ka sngi kaba nyngkong kaba itynnad bha, kaba la pynïaid da u nongrwai R&B ba pawnam ha ka pyrthei u Akon, uba la pynkyndit ïa ki paidbah da ki jingrwai ba pawnam na ka Superfan Tour jong u. Ka kynhun tem ba pawnam jong ka Boney M, ha ka jingleit phai jong ki, ka la pyni ia ka jingrwai kaba sngewtynnad.
Kiwei pat ki jingrwai ba pawnam ki kynthup ïa ki jingrwai da ka Jasleen Royal, ka jingpyni kaba pynkhih bor da u nongrwai na ka pyrthei u Lucas, bad ki jingshad ba khlaiñ bor da ki jingrwai ba sngewtynnad na ka thaiñ kum ka The Great Society, u Rito Riba bad ka Queen Sensation. Ha kane ka sngi la pyni ruh ïa ka jingïakob shna jain jong ka Sakura kaba la khmih lynti bha, ryngkat bad ki jingpynrung dur bad ki jaka die jingbam bapher bapher kiba la pynlong ïa ki paidbah ban ïashim bynta ha baroh kawei ka sngi.
Kaba pyndap ia ka jingjop jong ka tamasa, ka Japan Arena ka la pawnam kum ka jaka pdeng, kaba pynlong ia ki jingpyni ia ki anime, ki jingiakop pyni dur, bad ki jinglehkai ba iadei kiba la khring ia ki nongkyrshan na baroh ki rta. Ha baroh ar sngi, ki nongwan jngohkai ki la ïoh ruh ïa ki jingïalehkai karaoke, ki jingpyni ïalehkai sumo, bad ki jingïalehkai kiba sngewtynnad ha ka madan ïalehkai jong ka Japan kiba la pynlong ïa kane ka tamasa kum ka jingïalehkai kaba kynthup lang ïa baroh.
Ka jingpyrshang ba khlem sangeh jong ka Sorkar Meghalaya, lyngba kine ki tamasa ym tang ba ka wanrah da ki hajar ngut ki nongjngohkai pyrthei sha kane ka jylla, kaba thaw ïa ka nuksa kaba kyrpang ban kyntiew ïa ka roi ka par hynrei ka kyntiew ruh ïa ki khlur ba na ka ri bad kiba kwah ban long ki khlur jong ka Meghalaya kaba pynlong ïa ki nongrwai MGMP ban ïalehkai ha kum kane ka rynsan kaba heh. Haba plie ïa kane ka tamasa hynnin ka sngi, u Myntri ba donburom jong ka DoNER u Shri Jyotiraditya Scindia u la ïathuh ïa ka jingshem ba phylla jong u da kaba ong ba um pat ju ïohi ïa kum kane ka bor ha kano kano ka tamasa ha kylleng ka ri India. U la ïaroh ïa ka jingtrei shitom jong ka Sorkar bad ki paidbah ka Jylla Meghalaya, da kaba ong, “Hats off to Conrad; ha phi baroh(ki paidbah ka Meghalaya)”
Hapoh ka jingialam jong u myntri rangbah ba donburom u Shri Conrad K. Sangma, ka sorkar ka la trei shitom ban kyntiew ia ka kyrdan jong kane ka tamasa ha ka pyrthei. Ka jingpynbeit kaba khlem jingeh, ki prokram bapher bapher, bad ka jingpyrkhat ban pyni ïa ki sap ba la ïoh na ka thaiñ ryngkat bad ki khlur jong ka pyrthei ka pyni nuksa ïa ka jingthmu bad ka jingaiti lut jong u Myntri Rangbah ba donburom, uba long hi u nongtem bad u nongieit ba radbah ïa ka jingrwai.
Katba ka pyrda ka dang hap ha ka jingrakhe mynta u snem, ka Shillong Cherry Blossom Festival ka la pynshisha sa shisien ba ka dei ka jingïalang kaba kongsan, kaba wanrah lang ïa ki jingbha tam jong ka kolshor pyrthei bad ka ri katba dang rakhe ïa ka jingitynnad ba kyrpang jong ki syntiew soh jong ka Meghalaya.
