Ka Seng Khooid Ya Ka Wah Myntdu (KYM) kawei na ki seng treimon sngewbha kaba mih shakhmat ban kren bad dawa ïa ka hok jong ka Wah Myntdu kaba bsa umbam umdih ïa kiba bun ba lang.
Ka seng haka jingïatreilang ki Dorbar Shnong bapher bapher lem bad ki paidbah nongshong shnong, halor ka phang kaba ong “Save River Myntdu, Save Water. Save Humanity, Save Life” ha kane ka 14 bad 16 tarik u Naiwieng kala ïoh lad ban leit pynsngewthuh sha ki paidbah ha ka jingïalang bala pynlong ha Mynthong bad ha Loomïongkjam, Jowai.
U ma Khroo L Pariat, President KYM haba kren ha kine ki jingïalang ula pynsngew shaphang ka jingïaid lynti jong ka seng naduh bala seng ïa ka ha u snem 2021, kaba don ïa ka thong ban dawa na ka sorkar ban thaw ki lad ki lynti ban ai ka jingïada ïa ka Wah Myntdu, khnang ban im ki nongshong shnong kiba im talawiar ki bynta jong ka.
U ma G.H. Bareh haba kren ula ong ka Wah Myntdu kumba ka wan na ka hukum Blei kala ai shibun ki jingkyrkhu ïa ki briew kiba shong shnong ha talawiar jong ka, hynrei mynta kiba bun hi kim sngewthuh shuh ïa ka jinglong kyntang jong ka Wah Myntdu bad mynta kane ka Wah ka la don haka jingma kaba khraw eh na ka jingshah pynjulor. Kumta ki kyntu ïa baroh ban long kiba ïohi jngai ïa kane ka bynta.
Katba ka kong Juliana Challam kum ka longkmie na ka shnong Loomiongkjam, ka long ong ka Wah Myntdu ka ïam paid duhnud naka daw ka jingbym khieñkor shuh jong ki briew ïa ka jinglong kyntang jong ka, kumta ka buh ka jingkyntu ïa baroh ki nongshong shnong ka Jowai ba kin pyrkhat ïa ka Wah Myntdu da kaba ym dei ban pynjakhlia ïa ki bynta jong ka. Ka khot ruh ban don ka jingïatreilang bad ka seng Khooid Ya Ka Myntdu ha kino kino ki por.
Haba pynkut ïa ka jingïalang la ïoh ka jingkren ai khublei na u D. Manar uwei na ki samla ka shnong Jowai uba la dep thoh ïa ka jingïathuh khana shaphang ka Wah Myntdu ha ka pule la puthi.
