I kong Dahun Nongpluh iwei na ki longkmie na ka shnong Nartiang, West Jaintia Hills District i la ioh ban rah ia ka nam 2nd Runner’s Up ha ka Mrs Diva Northeast 2024 kaba la long ha nongbah Guwahati.
Haba kren bad i na ka liang i Dahun Nongpluh i pynpaw ka jingsngewnguh ia U Blei ia ka ïing ka sem bad kumjuh ia i mei i pa jong i, kiba la kyrshan ia i met bad mynsiem ban iashim bynta ha kane ka jingiakop Mrs Diva Northeast 2024.
Shuh shuh i la pynpaw ba ka jingshimbynta jong i ka dei ha ka sien ba lai namar i la iashim bynta la 2 sien ha jylla bad i khlem poi sha ka thong hynrei i khlem duh jingkyrmen bad dei ha ka sien ba lai kaba i la ioh rah ia ka nam jop ha ka 2nd Runner’s Up ha ka Mrs Diva Northeast.
I la bynrap da kaba ong “Ki jingeh kum ki briew ngi kynduh shibun ki jingeh bad kita ki jingeh kim khanglad ban poi sha kata ka thong. Ki jingeh nga shim kum ki mawjam ban poi sha ka thong”.
Shwa ban pynkut i la kyntu ia kiwei ki longkmie bad ki khun samla ba kim dei ban tieng lada don kano kano ka jingthmu bad dei ban don beit ka thong bad ka jingtrei shitom ban poi sha ka thong.