Ka Sorkar Jylla ryngkat ka jingïatreilang bad ka United Nations World Food Programme (WFP) ka la pynlong ïa ka jingïalang mynta ka sngi ka 18 tarik Naiweing 2024 , ban pynkhlaiñ ïa ka rukom sam marbam paidbah bad ban buh jingkheiñ ïa ki jingpyrshang ban ïatreilang ha ki por ban wan ban kyntiew ïa ka jingpynbiang marbam.
Ïa kane ka jingïalang la pynkup burom da u Coming One Ymbon, Myntri ba khmih ia ka tnat Food Civil Supplies bad Consumer Affairs ryngkat bad ka Elisabeth Faure, Country Director jong ka United Nations World Food Programme (UN-WFP).
Ha ka jingialang la iatai halor ki jingeh ba mynta jong ka Public Distribution System (PDS) bad ki bynta ba kongsan ban pynbha bad wad ia ki buit thymmai bad ki buit treikam ban kyntiew ia ka jingshai bad jingkitkhlieh ha ka rukom pynbiang ia ka PDS ha ka jinglong jong ka jylla Meghalaya. Ka la don ruh ka jingiakren halor ka jingthaw ia ka roadmap ba iatreilang kaba iadei bad ka jingthmu jong ka Jylla na ka bynta ka jingpynbiang bam ha Meghalaya.