Ka Hynniewtrep Intergrated Territorial organization (HITO), mynta ka sngi ka 19 tarik Naiwieng 2024 ka leit pan jingshai na i Joint Secretary jong ka District Council Affairs haba iadei bad ka Grant 27 klur jong ka Rural Local Bodies.
Haba kren sha ki lad pathai khubor na ka liang u President jong ka seng HITO Sengkmie u Bah Donbok Dkhar u la ong ba ka jingwan kynduh ia i Joint Secretary ka DCA ka dei halor ka Grant na ka sorkar pdeng lyngba ka 15th Finance Commission Grant ia ki Local bodies ha Meghalaya la mang kumba 27 klur, u la ong “Sha kiwei ki jylla kum Sha kerala ki don da ka panchayat, sha ngi ka iaryngkat bad ka Elaka kane ka 152 Block ka iaryngkat bad ka dorbar Raid dorbar Hima bad 41 Grant panchayat ki iaryngkat bad ki Dorbar shnong hapoh ka jylla jong ngi”.
Shuh shuh u la bynrap “Halor kane ka wan beit hapoh District Council ia kane ka rural local bodies haduh mynta ym pat shai mano ba dei hok ban ioh kumno la pyniaid bad ngi wan iakynduh ia i Joint Secretary ka District council affairs ban pan jingshai halor kane ka Grant local bodies.
Haba iakynduh bad i Joint Secretary i la pynpaw ba ia kane ka Grant la mang na Ministry of Panchayati Raj bad bad in sa khot iakren haba iadei bad kane ynda i la ioh jingpynshai haba iadei bad kane ka Grant 27 klur.
Shuh shuh u la ong “Ka jingwan pan jingpynshai shakhmat jong ka seng na ka DCA ngi tieng ioh ka jia biang kumba jia ha ki snem ba la dep ba ka mih kawei ka seng na District Council ba ki pyndonkam bakla ia ka fund ruh ym tip bad la iohi shai ba kumno ki pyndonkam ia ka Grant ne ka scheme kaba ki paidbah ki dei ban ioh hok kim ioh”.
Shwa ban pynkut u la bynrap biang da kaba ong “Lada ngim ioh jingpynshai na ka liang ka seng kan sa thoh sha ka Ministry bad sha u Governor lada kane ka Grant kam dei jong ka Raid bad Dorbar shnong dei ban sangeh shwa namar ia kane ka Grant khlem mang na ka bynta ka MDC scheme, lada ong ba ka dei ka MDC scheme ka la long ka politics namar u MDC un ai tang ia kiba ai phlang ym ai ia baroh, lada ka dei shisha ia ki nongpyniaid shnong ban sam ruh dei maki hi bad pyniaid dei maki bad ai jingmut ruh dei maki”.