Ka kynhun ïalehkai jong ka Diengshynrum SC kala long syndon ka lahduh haka lympung ïalehkai phutbol jong ka kyrdan 1st Division bala pynïaid da ka East Jaiñtia Hills District Football Association kaba la long mynta ka sngi 16 tarik u Naiwieng ha madan Artificial Turf, Diengshynrum, Khliehriat.
Haba phai sha ka jingïakhun phainal ka Diengshynrum SC kala jop da 1-0 kol ïa ka Shilliang Umshong SC, ïa katei ka shikol na ka Diengshynrum SC la thep lyngba u Diamond Sympli ha ka kylla miet jong ka minit ba 90+2 lyngba kane ka shikol kala ïoh ban long ka lahduh mynta u snem.
Ïa kane ka lympung la wan ban pynhap pyrda da u ma Tiufill Shadap kum u kongsan, ha ka jingdonlang u ma Delmi Shylla kum u symbud kongsan, ma Finelyness Bareh (EM JHADC) ma Kor Sympli, ma Kerlang Ksoo (Advocate), ki Waheh Shnong & ki riew paw khmat napoh District East Jaiñtia District bad ki nongkitkam ka EJHDFA.
Ïa ka nam Player of the Match la ïoh rah da u Fadical Pohshna na ka Diengshynrum SC, ïa ka nam Player of the Tournament la ïoh da u Josme Ryngkhlem na ka Wahiajer Narpuh YSSC, Best Goalkeeper la ïoh da u Yoomeki Dkhar na ka Shilliang Umshong SC, Top scorer la ïoh da u Henjoymang Khongsai na ka Shilliang Umshong SC uba la thep haduh 8 kol, ïa ka nam Goal of the Tournament la ioh da u Hikaidame Bareh na ka R.Synrang Shahkhain SC, katba ïa ka nam Best Team la ïoh da ka Wahiajer Narpuh YSSC.
