Ka Sengkhasi Kmie ha ka 23 Tarik Naiweing 2024, ka la ioh ban rakhe ia ka Sengkutsnem kaba 125 snem ha lympung Weiking Jaiaw, Shillong. Ha kane la sakhi da ki hajar kiba la wan ban ïashim bynta ha kane ka lympung ryngkat lang ki briew ki ba la shah khot sngewbha, ki paidbah bad kiwei kiwei.
Hashwa kane la pynlong ia ka jingiaid pyni riti ka seng kut snem ha Madan Iewrynghep, ha kaba ki la ai ka nguh ka dem da u Rgh KS Marbaniang, President ka Sengkhasi Nongthymmai Madanryting pyllun, la pynlong ruh ia ka shad mastieh bad sdang ia ka jingiaid pyni riti, da kaba rah ia ki tabut ki ba la wan na kylleng ka Ri Khasi Jaintia.
Katba ha ïingseng kaba don ha Mawkhar, la sdang ia ka Sengkutsnem da ka KsingLumpaid, ka jingpynkiew ia ka Lama bad plie ia ka Sengkutsnem 2024, la pynlong ruh ia ka nguh ka dem da ki kynhun ki tymmen ki san ka Sengkhasi kmie, bad ka jingpule ia ka sneng tymmen.
Ha Lympung Weiking la ioh ia ka jingkren pdiang da u Oplysor Pyngrope, President Sengkhasi kmie, ka nguh ka dem da ki kynhun ki san ka Sengkhasi kmie, ki jingrwai, ka jingkren na ki nongialam ka Sengkhasi kmie, bad ka jingpynlait paidbah ia ki Program rakhe 125 snem ka Sengkhasi da u Rgh .B.K. Dey Sawain, Adviser ka Sengkhasi Kmie bad bud da ka cultural program.
Haba kren bad u Bah Synroplang Kharshiing, Assistant General secretary ka Sengkhasi kmie, u la ong ba mynta u snem ka Sengkhasi ka la kynjoh sha ka 125 snem, kumta ka Sengkhasi kmie ka la ioh ban plie ia ki program rakhe 125 snem ka Sengkhasi, kaba la sdang naduh mynta ka sngi bad kan kut la shem snem bad ia kane yn rakhe ha baroh ki shnat seng ba bapher bapher.
“Ka jingrakhe mynta u snem ka la long kaba shongkun bha namar ka jingwan tuid ki paid Khasi na kylleng ki thaiñ, bad kat dang poi u snem ka jingrakhe ka dang heh dang heh, bad ngi kyrmen ba kane ka Jingrakhe kan dang heh shuh shuh” la ong u Bah Synroplang.
“Ia ka Sengkutsnem la ju rakhe ban kynmaw burom ia ka jingseng ia ka Sengkhasi bad ka daw bah ba la seng ia ka Sengkhasi ka long hadien ka jingwan ka jingkylla 125 snem mynshwa ha ki jingbud ia ka rukom im, ka riti dustur, bad ka jingngeit na ki nongwei ” u la bynrap.
